Sýret: gov.kz
Premer-mınıstrdiń orynbasary Qanat Bozymbaev jumys saparymen Abaı oblysyna baryp, kóktemgi sý tasqynyna daıyndyq barysyn zerdeledi. О́ńir ákimi Berik Ýálımen, Tótenshe jaǵdaılar mınıstrligi men Sý resýrstary jáne ırrıgasııa mınıstrligi basshylyǵymen birge sý basý qaýpi bar aýmaqtarǵa monıtorıng júrgizildi.
Jumys barysynda ózen arnalary, gıdrotehnıkalyq nysandar, qorǵanysh bógetteri men sý ótkizý júıeleri qaraldy. Sý basý qaýpi bar eldi mekenderdiń jaǵdaıy, qar jamylǵysynyń kólemi men ózenderdegi gıdrologııalyq ahýal da nazardan tys qalmady.
Vıse-premer Semeı qalasy men Jarma, Abaı, Borodýlıha, Aıagóz aýdandarynyń aýmaǵyn áýeden sholyp shyqty. Sapar aıasynda Aıagóz qalasyna, Shar sý qoımasyna baryp, aýdan ákimderimen kezdesti. Jergilikti bılik ókilderi kóktemgi kezeńge daıyndyq jóninde esep berdi.
Qazirgi derekke qaraǵanda oblystaǵy 64 eldi meken sý tasqyny qaýpi bar aımaqqa jatady. Úsheýinde qaýip tolyq joıylǵan. Taǵy 22 eldi mekende táýekel deńgeıi tómendetilgen. Al 39 eldi mekende tabıǵı qater saqtalyp otyr.
Aldyn alý sharalary aıasynda ınjenerlik jumystar júrgizilgen. Shamamen 42 shaqyrym qorǵanys bógetteri salyndy ári nyǵaıtyldy. Jeti shaqyrymnan astam ózen arnalary tazartylyp, tórt shaqyrym drenaj ben sý burý júıeleri retke keltirildi. Jergilikti bılik materıaldyq-tehnıkalyq ári qarjylyq rezervterdi jasaqtaýǵa kirisken. Eldi mekenderden 275 myń tekshe metr qar shyǵaryldy. О́zenderdegi muzdy jarý jumystary jalǵasyp jatyr.
Azamattyq qorǵaý júıesi kúsheıtilgen daıyndyq rejimine kóshirilgen. Qazirgi tańda 1 436 adam men 543 tehnıka birligi jumyldyrylǵan.
«Jalpy daıyndyq jumystary júrgizilip jatyr. Alaıda áýeden sholý nátıjeleri aýa temperatýrasynyń kúrt kóterilýi men qardyń qarqyndy erýi jaǵdaıynda jekelegen ýchaskelerde ahýaldyń kúrdelený qaýpi saqtalyp otyrǵanyn kórsetti. Osyǵan baılanysty ózen arnalary men sý ótkizý qurylystaryn ýaqtyly tazalaýǵa, tehnıka, sorǵy jabdyqtary men avarııalyq brıgadalardyń daıyndyǵyna erekshe nazar aýdarý qajet. Gıdrometeorologııalyq jaǵdaı ózgergen kezde áreket etý jedel bolýy tıis. Jumys aldyn alý qaǵıdaty boıynsha júrgizilýi shart», dedi Qanat Bozymbaev.
Oblys ákimdigine sý tasqyny qaýpi bar aýmaqtarda táýlik boıy monıtorıng júrgizý tapsyryldy. Eldi mekenderden qar shyǵarý qarqynyn arttyrý, gıdrotehnıkalyq qurylystar men qorǵanys bógetterine qosymsha tekserý uıymdastyrý, azamattyq qorǵaý kúshteriniń tolyq ázirligin qamtamasyz etý mindetteldi. Evakýasııa josparlaryn jańartý, ýaqytsha ornalastyrý pýnktteriniń daıyndyǵyn tekserý, halyqty jedel aqparattandyrý máselesi de nazarǵa alyndy.
Belgilengen merzimde atalǵan tapsyrmalardyń oryndalýy týraly Úkimetke naqty nátıjelermen jınaqtalǵan aqparat usynylýy kerek.
