Sondaı bastamashyl toptyń biri – «Halyq úni» táýelsiz baqylaýshylar toby. Búgin Almatyda arnaıy baspasóz máslıhatyn ótkizip, baqylaýshylyq ınstıtýttyń mańyzdylyǵy jaıly aıtty.
Qazir saıasattanýshylar – Nurbolat Nyshanbaı, Beknur Kısıkov, Nurgeldi Ábdiǵanı, Islambek Dastar bastaǵan top elimizdiń birqatar óńirinde baqylaýshylardy daıarlaý, oqytý jumystaryn úılestirip jatqanyn aıtady. Olar aldaǵy referendýmda «Halyq úni» baqylaýshylar tobynyń atynan daýys berý ýchaskelerinde baqylaýshylyq jasaýǵa daıarlanyp jatyr.
«Biz Astana, Almaty, Shymkent, Taldyqorǵan, Túrkisten sekildi birneshe óńirde baqylaýshylardy oqytý jumysyn júrgizip jatyrmyz. Referendým kúni biz ózimiz oqytyp, daıarlaǵan baqylaýshylardy ýchaskelerge kirgizýge, referendým barysyn baqylaýǵa nıettimiz. Bizdiń bul iste tájirbıemiz de jetkilikti. Osyǵan deıin elimizde ótken saılaýlar men referendýmdarda baqylaýshylyq jasap, baqylaýshylardy oqytý jumystaryn jasaǵanbyz. Búginde bizdiń qatarymyzda Qazaqstanǵa táýelsiz baqylaýshylyq ınstıtýtyn alǵash ákelgenderdiń biri, saqa saıasatker Dos Kóshim, Beknur Kısıkov bastaǵan aǵalarymyz bar. Shyn máninde, táýelsiz baqylaýshylardyń bolýy – qoǵamdyq jaýapkershilik. О́ıtkeni, táýelsiz baqylaýshy degenińiz – qoǵamnyń árbir sergek sanaly azamaty degen sóz. Siz de, sizdiń aınalańyzdaǵy belsendi azamattar da baqylaýshylyq jasaı alady. Ol úshin biz sekildi bastamashyl toptardyń qataryna qosylý kerek. Elmen birge, eldiń múddesin qorǵaý árbirimizdiń paryzymyz», deıdi «Halyq úni» baqylaýshylar tobyn qurýǵa bastamashy bolǵan saıasattanýshy Nurbolat Nyshanbaı.
Al belgili pýblısıst, saıasattanýshy Beknur Kısıkov:
«Kez kelgen saıası prosess – táýelsiz baqylaýshylarsyz ádil ótpeıdi. Sońǵy jyldary elimizde táýelsiz baqylaýshylar men toptar kóptep qurylýda jáne bul jaqsy úrdis. Bul qoǵamnyń saıası belsendiligi artyp kele jatqanyn kórsetedi. Biz qazir «Halyq úni» atynan baqylaýshylardy oqytyp jatyrmyz. Bul qyz-jigitter erteń ýchaskelerde baqylaýshylyq jasaıtyn bolady. Bizden kóbine «baqylaýshylarǵa ne bere alasyńdar?» dep suraıdy. Biz baqylaýshylarǵa aqsha nemese materıaldyq ıgilikter bere almaımyz. Biraq, biz baqylaýshylar óz tájirbıemizdi úıretýdemiz, bilgenimizdi aıtyp, bilimimizben bólisýdemiz. Onyń ústine, baqylaýshylardyń ózderi de bul iste materıaldyq ıgilik joq ekenin jaqsy biledi. Táýelsiz baqylaýshymyz dep júrgen azamattardyń barlyǵy, tipti meıli bizdiń uıym nemese basqalar bolsyn, ádil, taza saılaý ustanymy úshin júrgen azamattar», deıdi.
Jýrnalıst Islambek Dastan:
«Biz «Halyq úni» baqylaýshylar toby atynan Taraz qalasynda baqylaýshylardy oqytyp, daıarlap jatyrmyz. Aldaǵy referendýmda bizdiń baqylaýshylarymyz óz mindetterin múltiksiz atqaryp, referendýmnyń taza ótýine úles qosatyn bolady. Jalpy táýelsiz baqylaýshylardyń bolýynyń ózi árbir ýchaskege salmaq bolady. Táýelsiz baqylaýshylar otyrǵan ýchaskeler men baqylaýshylar otyrmaǵan ýchaskelerdegi qorytyndy nátıjelerdiń ózi-aq, kóp dúnıeden habar beredi», deıdi.
Al halyqaralyq sarapshy Nurgeldi Ábdiǵanıuly:
«Bizdiń buǵan deıingi jınaǵan tájirbıelerimizge súıenip, mynany aıta alamyz: Táýelsiz baqylaýshylar – kez kelgen elektoraldy naýqanda daýys berýdiń ádil, taza ótýine birden-bir múddeli top. Sońǵy jyldary elimizde ondaǵan táýelsiz baqylaýshy uıymdary qurylyp jatyr. Bul qýandady. Táýelsiz baqylaýshy toptardyń qarasy kóbeıgen saıyn, qoǵamda senim de paıda bolady. Daýys berý prosessteri de júıelene túsedi. Ashyqtyq pen tazalyqqa birtaban jaqyndaı túsemiz. Búginde bizdiń qatarymyzda jastar kóp. Jastardyń el ishindegi bolyp jatqan saıası naýqanǵa beı-jaı qaramaýy – eki ese jaqsy tendensııa. О́ıtkeni, ózgeristi qalaıtyn da, jasaıtyn da jastar», deıdi.
Referendým-2026: Saılaý ýchaskesin eGov Mobile arqyly tekserýge bolady
