Arqaly aqynnyń mereıtoıy kindik qaladan bastalýy beker emes. О́ıtkeni el ordasy Alataýdan Arqaǵa bet alǵan uly kóshpen birge Serik Turǵynbekuly da bas shaharǵa qonys aýdarǵan edi. Jańa elorda aqynǵa ekinshi tynys berdi. Astana týraly birneshe týyndy jazdy. Tarıhı dastandary ómirge keldi. Dramalyq shyǵarmalary qoıyldy. Sóıtip, aqynnyń elordamen birge shyǵarmashylyǵy da ósip, kemeldendi.
Is-shara tizginin aqyn Dáýletkereı Kápuly ustady. Kesh quttyqtaýlarmen bastaldy. Memlekettik keńesshi Erlan Qarınniń quttyqtaýyn aqyn Qalqaman Sarın oqydy. Odan keıin Ulttyq akademııalyq kitaphananyń dırektory Kúmis Seıitova mereıtoı ıesine izgi lebizin bildirip, syı-sııapat kórsetti. Sondaı-aq Jazýshylar odaǵy Astana qalalyq fılıalynyń dırektory Baýyrjan Babajanuly odaq tóraǵasy Mereke Qulkenovtiń quttyqtaý hatyn tapsyryp, aqyn ıyǵyna shapan japty.
Kesh barysynda jazýshy, Memlekettik syılyqtyń laýreaty Aldan Smaıyl mereıtoı ıesiniń shyǵarmashylyǵy týraly parasatty oı aıtty.
– Biz Serik ekeýmiz túıdeı qurdaspyz. Almatydaǵy Qazaq ulttyq ýnıversıtetinde qatar oqydyq. Sol jyldary atalǵan oqý ornynda ádebıet úıirmesi bolyp, sonda jas aqyndardyń poezııa keshteri jıi ótetin. Birde Keńshilik Myrzabekov pen Serik Turǵynbekovtiń qatysýymen sondaı jyr keshi ótti. Ekeýi bir-birimen jarysyp óleń oqydy. Ekeýiniń de óleńderi týǵan jeri – Torǵaıdyń saıyn dalasyndaı keń. Ekeýiniń de poezııasy basqa aqyndarǵa qaraǵanda tynysty, kórkemdigi, qurylymy basqasha edi. Sondaı-aq Seriktiń jaısań minezi men tazalyǵyn qazaqtyń tulǵaly azamattary erekshe jaqsy kórdi. Máselen, jazýshy Sáken Júnisov: «Men kórgenderdiń ishinde naǵyz aqyn bolyp jaratylǵan osy – Serik Turǵynbek» deıtin. Dál osy sózdi Aqseleý Seıdimbekten de estidim, – dedi qalamger.
Al ǵalym, Memlekettik syılyqtyń laýreaty Saýytbek Abdrahmanov Serik aǵamyzdyń aqyndyq minezi men poezııasy týraly qyzyqty áńgime órbitti.
– Sekeńniń búkil poezııasy Torǵaıdyń tósinen esken Saryarqanyń samaly sekildi qarapaıym keledi. Qońyr jel sekildi oqyrmandy sharshatpaıdy. Tógilip, quıylyp jatady. Odan sonshalyqty metaforalyq teńeý izdeý kerek emes. Qazaqtyń óleńi negizinen qarapaıym bolǵan. Osy turǵydan alǵanda Sekeńnen úırenetin qasıet kóp, – dedi ol.
Sonymen birge kesh barysynda belgili dıplomat Saılaý Batyrshauly, ǵalym, jazýshy Tursyn Jurtbaı, qalamger Joltaı Álmashuly, akademık Kárimbek Qurmanalıev, synshy Amangeldi Keńshilikuly, aqyn Muharbek Jákeı aıtýly azamattyń shyǵarmashylyǵy týraly jyly pikirlerin bildirdi. Mereıtoı ıesiniń óleńine jazylǵan ánder oryndaldy. Is-shara sońynda Serik Turǵynbekuly sóz alyp, jınalǵan qaýymǵa rızashylyǵyn jetkizdi.
