Ol buǵan deıin 2022 jyldyń 10 aqpanynda elordadaǵy trıatlon parkinde 150 shaqyrymdy 9 saǵat 56 mınýtta baǵyndyryp, bul kórsetkish Qazaqstan rekordtar kitabyna alǵashqy qysqy velomarafon retinde engen. Keıin Ramazan aıy kezinde de erekshe shartpen synǵa túsip, 109 shaqyrymdy qysqa ýaqytta júrip ótý arqyly taǵy bir rekord tirkegen.
Jalpy, ol velosherýdi kóbine tulǵalar mereıtoıymen baılanystyryp, qoǵamdyq úndeýge aınaldyryp keledi. Máselen, 2024 jyly Mustafa О́ztúriktiń 70 jyldyǵyna oraı Báıterekten bastalǵan baǵytpen 70 shaqyrymdy 5 saǵatta júrip ótken. Uıymdastyrýshylardyń aıtýynsha, mundaı bastamalar jastardy shydamdylyqqa, salamatty ómir saltyna, tabandylyqqa shaqyrýdy kózdeıdi.
Bul jolǵy jobanyń da ózindik máni bar. 160 shaqyrym – ult kóseminiń 160 jyldyq mereıtoıyna arnalsa, qysqy jaǵdaıda bir kúnde eńseriletin qashyqtyq – Táýelsiz el jastarynyń tózimi men asqaq rýhynyń belgisi. Bul bastama sporttyq kórsetkish qana emes, tarıhı jadty jańǵyrtyp, ulttyq qundylyqtardy dáripteýge baǵyttalǵan qoǵamdyq úndeý retinde usynylyp otyr.
Jańa jobanyń ózegi – jeke jetistik emes, ortaq rýhty oıatý. Ernattyń sózinshe, rekord halyqaralyq talaptarǵa saı rásimdelip, resmı túrde tirkelýge tıis, sondaı-aq bastamaǵa BAQ ókilderi men demeýshilerdi tartý josparlanǵan.
«Bul – jeke kórsetkishten buryn tarıhı jaýapkershilik. Ár býyn óz dáýiriniń synynan ótedi. Bizdiń syn – Táýelsizdiktiń qadirin is arqyly kórsetý», deıdi joba avtory.
