Jańa tehnıkanyń kezekti legin tapsyrý rásimi Tobyl jaǵasyndaǵy alańda ótti. Bul joly 11 orman sharýashylyǵyna 79 arnaıy tehnıkanyń kilti tabys etildi. Orman qorǵaýǵa, tilsiz jaýǵa qarsy shuǵyl áreket etýge arnalǵan qýatty tehnıkanyń deni Qostanaıdaǵy «SaryarqaAvtoProm», «AgromashHoldıng», «MTZ-Qazaqstan» zaýyttarynda qurastyrylǵan. Mysaly, shaǵyn órt sóndirý qurylǵysy qondyrylǵan JAC T6 júrdek kóligi orman ishindegi órtti jedel sóndirýge múmkindik beredi. Al zaýyttan sý jańa shyqqan Lovol, MTZ traktorlary jer jyrtý, kóshet egý, órt qaýipsizdigin qamtamasyz etý jumysyna taptyrmas qural. Munyń syrtynda, patrýldik qyzmetke 26 Lada Niva jeńil avtokóligi berildi.
Saltanatty is-sharaǵa qatysqan oblys ákimi tehnıkalyq bazany nyǵaıtý jumystary jalǵasatynyn jetkizdi.
– Orman – ulttyq baılyq, asa mańyzdy tabıǵı resýrs, óńirdiń ekologııalyq qaýipsizdiginiń negizi. Ony saqtaý mamandardyń kásibıligin ǵana emes, zamanaýı tehnıkany da talap etedi. Bıyl qosymsha 25 órt sóndirý kóligin, 9 traktor satyp alý josparlanyp otyr. Orman kúzetiniń kadrlyq quramy kúsheıtilip, qyzmetkerlerdiń jalaqysy 100%-ǵa ósti. Búgin tabystalǵan tehnıka – materıaldyq-tehnıkalyq bazany nyǵaıtý baǵytyndaǵy júıeli jumystyń nátıjesi. Jańa kólikter órt oshaqtaryna jedel jetýge, qaýipti seıiltýge, sondaı-aq ekologııalyq, ekonomıkalyq zalaldy tómendetýge múmkindik beredi. Tehnıkany jańartýmen qatar, kadr daıarlaý, sıfrlandyrý, órttiń aldyn alý máselesine de erekshe kóńil bólinedi, – dedi Qumar Aqsaqalov.
«Prıgorodnyı» orman sharýashylyǵynyń basshysy Erlan Ábenovtiń aıtýynsha, talaı jyldan beri tehnıkasy tozyp turǵan mekemeler memlekettik qoldaýdyń arqasynda eńse tiktep, áleýetin arttyrǵan.
– Keıingi jyldary tehnıkamyz jańaryp jatyr. Qazir mekemede 12 traktor bar. Ekinshi, úshinshi klasty sý jańa tehnıkalar berildi. Búgin 2 shaǵyn órt sóndirý keshenin, eki patrýldik «Nıva» aldyq. Osynyń bári memleketimizdiń orman baılyǵyna asa janashyrlyqpen qaraıtynyn kórsetedi. Jyl sanap kúsh-qýatymyz artyp keledi. Sonyń nátıjesinde keıingi jyldary orman órti azaıdy. Mysaly, byltyr bizge qarasty alqaptarda birde-bir órt bolǵan joq, – deıdi ormanshy.
Oblystyq tabıǵı resýrstar jáne tabıǵatty paıdalanýdy retteý basqarmasynyń málimetinshe, óńirdegi orman sharýashylyqtarynyń materıaldyq-tehnıkalyq bazasy 90%-ǵa jańarǵan.
Qostanaı oblysy
