Kezdesýlerde konstıtýsııalyq normalardy iske asyrý tetikteri, Memleket basshysynyń tapsyrmalaryn oryndaý máseleleri jáne aımaqtyń áleýmettik-ekonomıkalyq damý baǵdary sóz boldy. «Jańa Konstıtýsııa – uzaqmerzimdi damýdyń berik negizi» taqyrybyna arnalǵan dıalogke máslıhat depýtattary, etnomádenı birlestikterdiń ókilderi, belsendi jastar jáne jergilikti kásiporyndardyń eńbek ujymdary qatysty. Senat tóraǵasy elimizdiń aldynda turǵan strategııalyq maqsattarǵa qol jetkizý úshin azamattyq qoǵam ınstıtýttarynyń birlesken jumysy aıryqsha mańyzǵa ıe ekenin atap ótti.
Máýlen Áshimbaev qazir Qazaqstan aýqymdy saıası jańǵyrý kezeńin bastan ótkerip jatqanyn aıtty. Palata spıkeri osyǵan baılanysty óńir turǵyndarymen qoǵamdaǵy ózekti máseleler boıynsha tikeleı keri baılanys ornatý úshin ashyq dıalog júrgizýdiń jáne Memleket basshysy usynǵan reformalardy tıimdi júzege asyrý jolynda birlesip jumys isteýdiń mańyzy zor ekenin jetkizdi.
«Qazir elimiz, eshbir ásireleýsiz, óziniń damý jolyndaǵy naǵyz tarıhı kezeńdi bastan ótkerip jatyr. Keıingi jyldary biz táýelsiz memleket qalyptastyryp, turaqty damýdyń berik negizin qaladyq. Búginde Prezıdent Qasym-Jomart Toqaevtyń bastamalarynyń arqasynda ekonomıkamyzdy, óndiris pen kásipkerlikti júıeli túrde damytyp kelemiz. Adam kapıtalyn damytýǵa da erekshe kóńil bólinip, ǵylym men bilimge aýqymdy ınvestısııa salynyp jatyr. Osy turǵyda quqyqtyq jáne ınstıtýsıonaldyq júıemizdi jańartý qajettigi aıryqsha mánge ıe bolyp otyr. Biz ony jańa mindetterge, aldaǵy onjyldyqtarda álemdik damýdy aıqyndaıtyn úderisterge beıimdeýimiz kerek. Sondyqtan jańa Konstıtýsııa jobasy – eń aldymen, jańa syn-qaterlerge berilgen jaýap. Bul – jahandyq turaqsyzdyq jaǵdaıynda elimizdiń ári qaraı serpindi, turaqty damýyn qamtamasyz etýge arnalǵan jáne aldyn ala jasalǵan mańyzdy qadam», dedi Máýlen Áshimbaev.
Sondaı-aq Senat tóraǵasy jańa Konstıtýsııa jobasynyń negizgi baǵyttaryna toqtalyp, bul qujatty memleketti damytýdyń uzaqmerzimdi baǵdary jáne saıası júıeni keshendi jańǵyrtýdy kózdeıtin mańyzdy tetik dep atady. Onyń aıtýynsha, usynylyp otyrǵan ózgerister memlekettik ınstıtýttardy jan-jaqty jańǵyrtyp, zaman talaptaryna jedel beıimdeletin ıkemdi memlekettik júıe qalyptastyrýǵa múmkindik beredi.
«Jańa Ata zań jobasy kúshti ári quzyretti Parlament, tıimdi ári nátıjeli Úkimet jáne táýelsiz ári ashyq sot júıesin qalyptastyrýǵa jol ashady. Saıası partııalardyń róli kúsheıip, konsýltatıvtik ınstıtýttar damıdy. Sondaı-aq máslıhattardyń yqpaly artyp, ortalyq pen óńirler arasyndaǵy ózara is-qımyldyń tıimdi júıesi qurylady. Munyń bári ártúrli áleýmettik jáne etnostyq toptardyń pikirin eskere otyryp, memleketke ýaqtyly ári salmaqty sheshim qabyldaýǵa múmkindik beredi», deı kele Senat tóraǵasy óńir turǵyndarymen kezdesýde aldaǵy kezeńde birlesip atqaratyn jumystyń negizgi baǵyttaryna nazar aýdardy.
Oblystyń belsendi jastarymen kezdesýde Máýlen Áshimbaev konstıtýsııalyq ózgerister jas býynǵa óz áleýetterin júzege asyrýǵa mol múmkindik beretinin aıtty. Sonymen qatar ol memlekettik bastamalardyń tabysty júzege asyrylýy, eń aldymen, azamattyq jaýapkershilikke jáne jastardyń eldiń qoǵamdyq ómirine belsendi qatysýyna tikeleı baılanysty ekenin atap ótti.
«Jańa Konstıtýsııa jastarǵa úlken múmkindikter keńistigin usynady. Onyń negizinde ádilettilik, zań ústemdigi jáne teń múmkindikter qaǵıdattary jatyr. Bul – árbir jas azamat óziniń biliminiń, eńbeginiń jáne bastamashyldyǵynyń arqasynda áleýetin tolyq júzege asyra alatyn jaǵdaı degen sóz. Ata zań jobasynda bilim, ǵylym, mádenıet jáne ınnovasııany damytýǵa arnalǵan basymdyqtar bekitilip, shyǵarmashylyq erkindik pen zııatkerlik menshikti qorǵaý kepildikteri qarastyrylǵan. Iаǵnı daryndy, bilimdi ári bastamashyl jastardy qoldaý el damýynyń strategııalyq basymdyǵyna aınalady. Bul rette jastardyń óz jaýapkershiligin tereń sezinip, qazirgi tarıhı ózgeristerdiń aýqymyn túsinip, eldiń qoǵamdyq ómirine belsendi aralasýy asa mańyzdy», dedi Senat tóraǵasy.
Sonymen qatar sapar barysynda Máýlen Áshimbaev «ZIKSTO» JShS vagon jasaý zaýytynyń jáne qaǵaz ónimderin shyǵaratyn «Rım-QazAgro» fabrıkasynyń eńbek ujymdarymen kezdesti. Budan bólek Parlament depýtattary «Maǵjan ortalyǵynyń» jáne Petropavl qalasyndaǵy erekshe qajettilikteri bar balalarǵa arnalǵan №2 korreksııalyq mektebiniń qyzmetimen tanysty. Sondaı-aq atalǵan oqý ornynyń ustazdarymen, «Sensitive» estý qabileti tómen bıshiler ansamblimen jáne óńirdiń basshylarymen kezdesti.
