Lıanıýngan – Almaty turaqty poıyzy jolǵa shyqty

Keshe «Qazaqstan temir joly» UK» AQ-tyń prezıdenti Asqar Mamın bastaǵan delegasııa Lıanıýngan – Almaty turaqty konteınerlik poıyzyn shyǵaryp salý rásimine qatysty. Shyǵaryp salý saltanatyna Szıansý  provınsııasynyń vıse-gýbernatory Shı Hepın,  Lıanıýngan qalalyq partııa komıtetiniń hatshysy Iаn Sınshı men basqa da resmı adamdar qatysty. Lıanıýngan qalasyndaǵy porttaǵy Qazaqstan – Qytaı birlesken termınaly Elbasy Nursultan Nazarbaevtyń bastamashylyǵymen ashylǵan. Kóliktik-logıstıkalyq termınal Qazaqstannyń temirjol kóligi arqyly tranzıttik áleýeti men eksporttyq-ımporttyq jaǵdaıyn damytýǵa baǵyttalǵan. Ol Ońtústik – Shyǵys Azııa men Azııa – Tynyq muhıt aımaǵy elderine shyǵatyn qysqa baǵdarlar men Ortalyq Azııa elderin, Parsy shyǵanaǵy, Reseı, Kavkaz aımaǵy jáne Eýropamen jalǵaıdy.   Atalǵan joba Prezıdent N. Nazarbaevtyń «Nurly Jol»  qazaqstandyq saıasaty men QHR Tóraǵasy Sı Szınpın qoldaǵan Jańa Jibek joly ekonomıkalyq beldeýin damytýǵa yqpal etedi. «Qazaqstan temir joly» UK» AQ delegasııasy Szıansý provınsııasy men Lıanıýngan qalasy basshylyǵymen jumys kezdesýi barysynda taraptar Qazaqstan – Qytaı birlesken termınalyn damytý dınamıkasynyń joǵary ekendigin erekshe atap ótti. 2014 jyly 19 mamyrda jumysyn bastaǵan termınaldan 65 myń konteıner óńdeýden ótkizildi. Bıylǵy jyly 250 myń DFE konteınerin óńdeýden ótkizý josparlanyp otyr. Szıansý provınsııasynda 74 mıllıon adam turady. Damyǵan aımaqtyń IJО́-si 100 mlrd. AQSh dollarynan asady. Al Lıanıýngan teńiz porty jylyna 210 mıllıon tonna júk ótkizetin álemniń 20 iri porty qataryna jatady. «Egemen-aqparat».