Aldyn ala kórsetilimge Senat tóraǵasy, Qazaqstan bochcha federasııasynyń Prezıdenti Máýlen Áshimbaev bastaǵan Palata depýtattary qatysty. Jańa týyndyda kásibı akterlermen qatar bochchamen aınalysatyn parasportshylar da óner kórsetedi. Bul týyndynyń shynaıylyǵy men mazmunyn arttyra túsken qadam boldy.
M.Áshimbaev kórermendi jańa kartınanyń jaryq kórýimen quttyqtap, parasportshylardyń ómirine arnalǵan «Erekshe» kórkem fılmi elimizde ınklıýzıvti qoǵam qalyptastyrý úderisine serpin beretinine senim bildirdi. Sondaı-aq ol bul másele Memleket basshysynyń basty nazarynda ekenine toqtaldy.
«Prezıdent Qasym-Jomart Toqaev barshaǵa teń múmkindik beretin ınklıýzıvti qoǵam qurý máselesine únemi basa mán berip keledi. Osy bastamany iske asyrý aıasynda memleket deńgeıinde tıisti jumys qolǵa alynyp, kedergilerdi joıý jáne múgedektigi bar adamdardyń quqyqtaryn qorǵaý úshin keshendi sharalar qabyldanyp jatyr. Búginde elimizde júzege asyrylyp jatqan jańǵyrtýlar, sonyń ishinde konstıtýsııalyq reforma da ádilettilik, teń múmkindikter, ashyq ári ınklıýzıvti qoǵam qaǵıdattaryn nyǵaıtýdy kózdeıdi», dedi M.Áshimbaev.
Sonymen qatar Senat tóraǵasy fılmniń mańyzy men ózektiligine toqtalyp, onyń qalyptasqan qundylyqtardy jańasha paıymdaýǵa, álemge ár qadamynyń ózi úlken jeńiske aınalatyn adamdardyń kózimen qaraýǵa múmkindik beretinin aıtty.
«Inklıýzııa mádenıeti tek zańnamalyq negizben qalyptaspaıdy. Ol, eń aldymen, shynaıy janashyrlyqqa, adamgershilikke, ózara qoldaýǵa taban tireıdi. Kıno – osyndaı qundylyqtardy dáripteýdiń mańyzdy tetikteriniń biri. «Erekshe» fılmi – elimizdegi parasportty damytýǵa, parasportshylardyń áleýetin ashýǵa jáne ınklıýzııa mádenıetin ilgeriletýge qosylǵan úlken úles. Bul joba óner men jyly ázil arqyly erekshe qajettiligi bar adamdarǵa qatysty mańyzdy taqyryptardy qozǵaýǵa yqpal etedi. «Erekshe» – qaısar minez ben erik-jiger týraly fılm. Bul – senim men naqty maqsat jolyndaǵy qajyrly eńbek qoǵamdaǵy úlken jeńisterge negiz bolatynyn kórsetetin áserli oqıǵa», dedi Senat tóraǵasy.
Sondaı-aq M.Áshimbaev «Kinopark» kınoteatrlar jelisiniń basshysy Almaz Maldybaevqa, fılm rejısseri Ernar Nurǵalıevke, ssenarıı avtory Serjan Serikbaıǵa, prodıýserlerge, akterlik quram men túsirilim tobyna atalǵan mańyzdy áleýmettik bastamany qolǵa alyp, parasportshylarǵa qoldaý kórsetkeni úshin alǵys bildirdi.
Fılm túsirilimine kásibı akterlermen qatar Qazaqstan men Qyrǵyzstan bochchashylary da qatysty. Bul qadam jarys atmosferasyn barynsha shynaıy jetkizýge múmkindik berdi. Basty rólderdi Jasulan Kópbergen, Aqerke Nazarbekova men Rasýl Baýyrjan somdady.
Kınokartınanyń sıýjetinde ómirge jeńil qaraıtyn jas jigit Armannyń taǵdyry sýretteledi. Ol bir qateliktiń saldarynan sport kesheninde qoǵamdyq jumys atqarýǵa májbúr bolady. Sol jerde Áıgerim men onyń baýyry Dıdarmen tanysyp, múlde basqa álemge tap bolady. Bul jerde shynaıy kúsh ataq-dańq, aqshamen emes, tózim, senim, asqaq rýhpen ólshenedi.
Aıta keteıik, fılm Qazaqstan bochcha federasııasynyń bastamasymen «Kinopark» kınoteatrlar jelisi men «Tiger Films» prodıýserlik stýdııasynyń, basqa da seriktesterdiń qoldaýymen túsirildi. Jańa kartınanyń kınoteatrlardaǵy kórsetiliminen túsken qarajat múgedektigi bar balalardy qoldaýǵa jumsalady.
