Palatalar tóraǵalarymen konsýltasııa ótkizdi

Elbasy Nursultan Na­zarbaev Parlament Sena­tynyń Tóraǵasy Qasym-Jo­mart Toqaevpen jáne Par­lament Májilisiniń Tóraǵasy Qabıbolla Jaqypovpen konsýltasııa ótkizdi, dep habarlady Prezıdenttiń baspasóz qyzmeti. Kezdesý barysynda Qazaqstan Respýblıkasy Prezıdentiniń saılaýyn ótkizý týraly Qazaqstan halqy Assambleıasynyń bastamasy qaraldy. Memleket basshysy bul bas­tamany el-jurt, sonyń ishinde eń­bek ujymdary men qoǵamdyq bir­lestikter músheleri, zııaly qaýym, jastar jáne aǵa býyn talqylap jatqanyna toqtaldy. – Bastamany Parlament palatalary da qarap, qoldaý bildirdi jáne maǵan tıisinshe úndeý joldady. Parlament Senatynyń saýaly boıynsha Konstıtýsııalyq Keńes osy másele jóninde normatıvtik qaýly qabyldady, – dedi Qazaqstan Prezıdenti. Nursultan Nazarbaev eldegi negizgi salalardy damytýǵa ba­ǵyt­talǵan birqatar memlekettik uzaq merzimdi baǵdarlamalardyń bel­sendi túrde júzege asyrylyp jatqanyna nazar aýdardy. – Meniń oıymsha, qa­zaq­stan­dyqtar atalǵan baǵdarlamalardy júzege asyrý isine jumylý úshin saılaý ótkizý qajet dep sanaıdy. Sondaı-aq, turǵyndar álemde bolyp jatqan oqıǵalarǵa jáne el ishindegi turaqtylyqty saqtaýǵa baılanysty alańdaıdy. Budan arǵy jumys úshin halyqtyń qol­daýy qajet, – dedi Memleket basshysy. Q.Toqaev Konstıtýsııa ere­je­leri­ne saı keletin Prezıdent saılaýyn ótkizýdi qoldady. Ol qazirgi ýaqytta, álemde qalyp­tasqan turaq­syzdyq jaǵdaıynda búkil eli­mizge Memleket bas­shy­synyń be­deli qajet ekenin atap ótti. Q.Jaqypov Májilis depýtattary men Qazaqstan qoǵamynyń túr­li toptary eldiń jetistikteri men álemdegi ahýaldy eskere kelip, saı­laý ótkizýdi qoldap otyrǵanyn aıtty.