Keshe Memleket basshysy Nursultan Nazarbaev Alataýdyń baýraıyndaǵy ásem qala Almatydaǵy tabıǵatty ózine jaqyndatyp, ormandy, baý-baqshaly etip jasalǵan Qazaqstan Respýblıkasynyń Tuńǵysh Prezıdenti atyndaǵy saıabaqty aralap kórip, jýyrda ǵana ashylǵan shahardaǵy eń iri ári bıik sýburqaqty tamashalady.
Esterińizde bolsa, osydan birneshe jyl buryn Elbasynyń bastamasymen arý qala Almatynyń ǵajaıyp tabıǵatyna, kórkine kórik qosqan, qaladaǵy eń ásem demalys oryndarynyń biri bolyp tabylatyn dendrosaıabaqtyń irgetasy qalanyp, birneshe kezeńdermen iske asyrylǵan bolatyn. Bir aıta keterligi, osydan bir aı buryn Almaty qalasy máslıhatynyń kezekti sessııasynda almatylyqtar men qala qonaqtarynyń demalys ornyna, kóz qýanyshyna aınalyp úlgergen burynǵy Ál-Farabı dańǵyly men Dýlatı kóshesiniń qıylysyndaǵy eń kórkem dendrosaıabaqqa Tuńǵysh Prezıdenttiń esimi berilgen-di.
Jýyrda Arqa tósindegi bas qalamyz – Astana kúnine oraı saıabaqtyń kóz tartqan jańa kelbetin odan beter ajarlandyrǵan bıiktigi 21 metrge jýyq jańa sýburqaq atqylap, qala jurtshylyǵy kózaıym boldy. Bul kúńgeıdegi bas qalamyzdaǵy eń iri sýburqaqtyń jalpy sý syıymdylyǵy 2820 tekshe metr, dıametri 52 metr, 8 sorǵy toptamasynan jáne túrli jaryqtandyrǵyshtardan quralǵan. Ásirese, alýan tústi, sýdy sazdy áýenmen túrli formada san qubyltyp turatyn sýburqaq kimdi bolsa da qyzyqtyrary haq.
Almaty qalasynyń bas sáýletshisi Saıran Fazylov Memleket basshysyna saıabaqtyń maketin kórsetip, aýmaǵy 73 gektardan astam jerdi alyp jatqanynan, ondaǵy otyrǵyzylǵan 8 myń alýan túrli aǵashtyń jasy on jyl shamasynda ekendiginen habardar etti. О́z kezeginde Memleket basshysy saıabaqtyń aýmaǵyndaǵy aldaǵy ýaqytta atqarylatyn josparlarmen tanysty. Sondaı-aq, saıabaq aýmaǵynda golf-alańyn ornalastyrý múmkindigin qarastyrýdy, demalys ornyn odan ári sáýlettendirýdi tapsyrdy.
Gúlzeınep SÁDIRQYZY, Sýretterdi túsirgender S.BONDARENKO, B.OTARBAEV.
