Kalachı turǵyndary jaıly jerge qonys aýdardy

Uıqy aýrýyna shaldyqqan Kalachı aýylynyń turǵyndaryn, Úkimet tarapynan qabyldanǵan sheshimge sáıkes, Aqmola obly­sy­nyń ózge eldi mekenderine qo­nystandyrý jalǵasyp jatyr. Olarǵa jergilikti jerlerde eńbek jáne áleýmettik-turmystyq jaǵdaılar qarastyrylǵan. Áıtkenmen, kóptegen adamdar kindik qany tamyp, baýyr basqan týǵan óńirinen jyraqtaǵysy kelmeıtinin ótingen edi. Res­pýblıka, oblys basshylyǵy buǵan túsinistikpen qaraýmen qatar, naqty is-qımyl sharasyn júzege asyrýda. Keshe Aqmola oblysynyń ákimi Sergeı Kýlagın aýdan ortalyǵy Esil qalasynda bolyp, Kalachı turǵyndary úshin salynyp jatqan kóp qabatty eki úıdiń qurylys ju­mystarynyń barysymen ta­nys­ty. Jańa shaǵyn aýdandaǵy 45 páterlik úı qurylys nysanynyń jalpy quny 263,7 mıllıon teńgeni quraıdy. Merdiger uıym búgingi kúni qarjynyń 142 mıllıon teńgesin ıgerip otyr. Qazir bes qabatty úıdiń tórtinshi qabatynyń kirpishteri qalanýda. Osyndaǵy 75 qurylysshy kilt tapsyrý saltanatyn aldaǵy qazan aıynan keshiktirmeýge senimdi. Al, taǵy bir qurylys alańy №9 turǵyn úı qurylysy qar­qyndy kúsheıtýdi talap etedi. 75 páterli bul kóp qabatty úıge bıýdjetten 399,4 mıllıon teńge qarjy bólinse, onyń ıgerilýi 30 paıyzdy ǵana qurap otyr. Alaıda, mańyzdy iske jumyldyrylǵan 100 adam bul nysannyń kestege saı paıdalanýǵa berilýin qamtamasyz etemiz dep sendirdi. Baqbergen AMALBEK, «Egemen Qazaqstan». Aqmola oblysy, Esil aýdany.