Kommýnıster ustanymy aıqyn

Keshe Astanada Qazaqstan Kommýnıstik halyq partııasynan (QKHP) kandıdat Turǵyn Syzdyqovty qoldaıtyn respýblıkalyq saılaýaldy shtabtyń tusaýkeseri bolyp ótti. Ol Astana qalasynda ornalasqan. Sharaǵa QKHP Ortalyq komıtetiniń hatshysy, Qazaqstan Respýblıkasy prezıdenttigine kandıdat Turǵyn Syzdyqov, QKHP OK hatshysy Jambyl Ahmetbekov, «Halyqtyq kommýnıster» fraksııasynyń jetekshisi Vladıslav Kosarev, respýblıkalyq saılaýaldy shtabynyń basshysy, Parlament Májilisiniń depýtaty Aıqyn Qońyrov, BAQ ókilderi qatysty. Sonymen, QKHP-dan kandıdat Turǵyn Syzdyqovty qoldaý saılaýaldy shtabyna Májilis depýtaty Aıqyn Qońyrov basshylyq jasaıtyn boldy. Saılaýaldy shtaby saılaýaldy naýqanyna qatysýshy Turǵyn Syzdyqovqa qoldaý kórsetýdi aldyna maqsat etip qoıǵan. Shtabtyń min­detine, sondaı-aq, partııanyń óńirler­degi belsendiligin arttyrý, partııa­ny jaqtaýshylardy saılaýaldy min­det­terdi tabysty sheshý úshin jumyldyrý boıynsha jumystar júrgizý jatady. Tusaýkeser barysynda Qazaqstan Respýblıkasy prezıdenttigine kandıdat Turǵyn Syzdyqovtyń komandasy úgit naýqany kezindegi ózderiniń josparlarymen bólisti. Shtab basshysy Aıqyn Qońyrov brı­­fıngte jınalǵandardy saılaý naý­qa­ny­nyń josparlarymen tanystyrdy. «Bizdiń josparymyz is júzinde búkil saılaýaldy naýqanyna derlik ja­zyp qoıylǵan. Bular – zaýyttar men fab­rıkalardyń eńbek ujymdarymen jáne bizdiń partııamyzdyń qoǵamdyq qabyldaýlarynda qarapaıym azamattarmen kezdesýler ótkizý», dep atap ótti A.Qońyrov. Sondaı-aq, keshe QKHP-dan pre­zı­denttikke kandıdat Turǵyn Syzdy­qovty qoldaý saılaýaldy shtaby úgit poıyzynyń tusaýkeseri ótti. Bul – partııanyń sımvolıkasymen bezendirilgen úsh mashınadan tura­tyn avtokerýen. Shtab basshysy Aı­qyn Qońyrov atap ótkendeı, úgit poıy­zynyń alǵashqy toqtaıtyn jeri Kók­shetaý qalasy, ıaǵnı Aqmola oblysynyń ortalyǵy bolady. Dál sol jerde halyqtyq kommýnıster ózderiniń saılaýaldy tuǵyrnamasyn nasıhattaýdy bastap, QKHP-dan úmitker úshin úgit jumystaryn júrgizedi. Kókshetaýda kandıdattyń jastar ókilderimen jáne oblystaǵy birqatar kásiporyndardyń eńbek ujymdarymen kezdesýleri josparlanǵan. Odan ári delegattar Qostanaı, Pet­ropavl, Almaty jáne Qazaqstannyń bas­qa qalalaryna sapar shegedi. Bar­lyǵy 40 shara josparlanyp otyrsa, kandıdattyń kem degende 11 márte jurtshylyq aldynda sóz sóıleýi belgilengen. Qazir, kommýnısterdiń ózderi atap kórsetkendeı, resýrstardy jumyldyrý qajet. Búgingi kúsh keń aýqymdy nasıhat pen shtab jumysy úshin jetkiliksiz. Eske sala ketsek, úgit naýqany bir aı derlik ýaqyt – «tynyshtyq kúnine» deıin júretin bolady. Qazaqstan Respýblıkasy prezıdent­tigine kandıdat Turǵyn Syzdyqov óziniń sózinde atalǵan elektorattyq naýqannyń  mańyzdylyǵyn atap kórsetti: «Biz saılaý úderisine alǵash ret qatysyp otyrǵan joqpyz, biz úshin bul esh jańalyq emes. Biz berilip otyrǵan múmkindikti halyqqa ózimizdiń baǵdarlamany taǵy bir márte jetkizý úshin, ózimizdiń maqsattarymyz ben mindetterimizdi tanystyrý úshin, saılaýaldy tuǵyrnamamyzdyń basym­dyqtaryn egjeı-tegjeılirek túsindirý úshin paıdalanǵymyz keledi», dedi ol. «Jumysty adal, tolerantty júr­gizetin bolamyz. Sebebi, adamdar kimniń qandaı baǵdarlamany usynyp otyrǵanyn jáne onyń qaıda aparatynyn anyq bilýleri tıis. Bizdiń saılaýaldy tuǵyrna­mamyz­dyń quramdasynyń biri azamat­tarymyzdyń keleshek býyny úshin teńdeı alǵy­sharttar men múmkindikter týǵyzý, tıimdi áleýmettik lıftiler men joǵary qoǵamdyq murattar úshin jaǵdaılar jasaý bolyp tabylady», dedi shtabtyń tusaýkeseri kezin­de prezıdenttikten úmitker Turǵyn Syzdyqov. Tusaýkeser aıaqtal­ǵan soń shaqyrylǵandarǵa úgit materıal­darynyń úlgileri úlestirildi. Atap kórsetetin bir jaıt – keshe saılaýaldy shtabtary elimizdiń barlyq óńirlerinde ashyldy. Kandıdat Turǵyn Syzdyqov 1966 jyly Qazaqstannyń aýyl sharýa­shy­lyǵyn mehanıkalandyrý jáne elektr­lendirý tehnıkýmyn «tehnık-mehanık» mamandyǵy boıynsha bitirgen. 1974 jyly Máskeýde BLKJO OK janyndaǵy Joǵary komsomol mektebiniń túlegi atansa, 10 jyldan soń Selınograd aýyl sharýashylyǵy ınstıtýtyn «ǵalym-agronom» mamandyǵyn alyp, támamdap shyqty. Kandıdat Turǵyn Syzdyqov óziniń eńbek jolyn slesar bolyp bastaǵan. Keıinirek traktorshy, mehanık jáne «Kazahselmash» zaýytynda sheber bolyp istedi. KSRO kezinde kommýnıster qataryna alyndy. Sol kezde búgingi kandıdat 26 jasta bolsa, qazir 67-de. Búgin ol partııa Ortalyq komıtetiniń hatshysy laýazymyn ıelenip otyr.