Inspektorǵa para berýshi ustaldy

Atyraýda jyljymaly jedel basqarý ortalyǵynyń ınspektoryna para bermek bolǵan kólik júrgizýshisiniń áreketi iske aspady. ««VAZ-21014» kóliginiń júrgizýshisi joldyń qarsy baǵytyna shyǵyp, jol erejesin óreskel buzǵan. Biraq, ákimshilik hattama toltyrtpaı, jaýapkershilikten qashý úshin ınspektorǵa eki myń teńge kóleminde para bermek bolǵan. Al muny kórip otyrǵan beınebaqylaý ınspektory sol boıda bul derekti Atyraý oblystyq ishki ister departamentiniń ózindik qaýipsizdik basqarmasyna habarlaıdy. Atalǵan basqarmanyń qyzmetkerleri 1978 jyly týǵan júrgizýshini bultartpas aıǵaqpen ustady. Qazir para berýshini tıisti jaýapkershilikke tartý máselesi sheshilýde», dep habarlady depar­tamenttiń baspasóz hatshysy Gúl­nazıra Muhtarova. Onyń málim etýinshe, jyl basynan beri ákimshilik polısııa basqarmasynyń jol-patrýldik qyzmetkerleri jolda júrý erejelerin buzýdyń 13000-ǵa jýyq faktisin anyqtady. Tirkelgen faktiniń 7 myńnan astamy jol erejesin óreskel buzǵandarǵa qatysty bolyp otyr. Joldasbek ShО́PEǴUL, «Egemen Qazaqstan». Atyraý oblysy. sýret: http://alau.kz/