«Sezim shirkin aq jańbyrǵa uqsaıdy, Almatyda jańa jaýyp basylǵan»

Almatyny jaqsy biletin jan balasy: «Jańbyr jaýǵany nesi, Almaty úshin sol da jańalyq bop pa?» der tańdanyp! Degenmen de, dál mundaı nóserli jańbyrdyń bıylǵy mamyr aıynyń 9-nan keıin Almatyda jaýmaǵanyn qala halqy umytpaǵanyn eske sala keteıik. Arǵy kúni keshkilik bastalǵan nóserli jańbyr keshe keshke deıin toqtamaı jaýdy. Sondyqtan da almatylyqtar úshin ol kúnniń basty da eń mańyzdy oqıǵasy osy jaýyn boldy. Ala jazdaı Alataý munartyp, kún shyjyp, termometrdegi synap baǵanasy + 40 gradýs­tyń tóńireginde turyp alǵan. 27 shilde kúni sońǵy ret jaýǵan jańbyr bir sátke ǵana shań basyp, sebelep ótken de ketken... Osy eki arada, shań basar jańbyrdan tórt-aq kún buryn, qýyqtaı ǵana eleýsiz aǵyp jatqan Qarǵaly ózeninen eshkim kútpegen sel júrdi. Sel degen aty, bolmasa taý bók­terinen bas­taý alatyn qa­lanyń eki shaǵyn aýdanynyń kóshelerinen qoı tastar ara­lasqan laı kóshkini tasyr-tusyr aqty. Elde záre qalmady. Áıteýir, adamdar aman. Ol aýmaqta tabıǵat apatynyń zardabyn joıý isi áli de qarqynyn báseńdetpeı júrip jatyr. Ǵalymdar men mamandar, kónekóz qala turǵyndary aınalyp kelgende bul apat Almatyda buryn-sońdy bolmaǵan sol ystyqtyń saldarynan keldi degendi aıtady. Jańbyr basylsa, kádimgi jurttyń kózine jyly kóri­netin aq bas Alataýdyń ushar basy da kórinip qalar. «Endi Alataýdyń basyna qar túsedi. Taý sánine kelip, muzdaqtar qaıtadan qursaý­lanyp, qataıady» dep qýanyp júrgender de bar. О́ıtkeni, muzdaq myǵym bolsa – etektegi elge qaýipsiz, jónimen ǵana erise – Almaty hal­qynyń shólin basatyn aýyzsý! Almaty aspanynyń tú­nerip turyp alǵanyna qa­raǵanda taý eteginde jańbyr jýyq arada basylmaıtyn da sııaqty... Halyq birden jyly kıi­nip, qolshatyr ustady. Eki kózderi bult sharpyǵan Alataýda!.. Talǵat SÚIINBAI, «Egemen Qazaqstan». ALMATY.