Apple basshysy bar baılyǵyn qaıyrymdylyqqa jumsamaq

ASTANA. 27 naýryz. Apple korporasııasynyń basshysy Tım Kýk óziniń bar baılyǵyn qaıyrymdylyqqa jumsamaq. Fortune basylymyna bergen suhbatynda ol 10 jasar týys inisiniń kolledjdegi oqýyna ketetin shyǵyndy ótep bolǵan soń osyndaı qadamǵa baratynyn aıtty. Bul týraly lifenews.ru habarlady. Tım Kýk qazirdiń ózinde qaıyrymdylyqpen aınalysyp keledi. Desek te, ol azdaǵan ýaqyt úzilis alyp, bul isti júıelep alýdy kózdep otyr. «Men aqshamdy ońdy-soldy shasha bermeı, kedeı-kepshikke júıeli túrde kómekteskim keledi», – deıdi ol. Búgingi tańda kásipkerdiń taza baılyǵy 120 mıllıon dollarǵa teń. Sondaı-aq, ol Apple-diń quny 665 mıllıon dollardy quraıtyn aksııasyna ıe. 54 jastaǵy menedjer Apple korporasııasyn 2011 jyldyń tamyz aıynan bastap basqaryp keledi. 2014 jyly ol CNN-niń anyqtaýy boıynsha «Jyldyń eń úzdik atqarýshy dırektory» ataǵyn ıemdendi. Kýk tabysyn qaıyrymdylyqqa jumsaıtynyn jarııalaǵan alǵashqy mıllıoner emes. Mundaı ıgi istiń basynda belgili mıllıarderler Ýorren Baffet pen Bıll Geıts tur. Olar 2010 jyly Giving Pledge atty fılantropıkalyq kampanııasyn qurdy. Bul uıymmen seriktes bolǵysy kelgen adam bar baılyǵynyń jartysynan kóbin qaıyrymdylyqqa jumsaıtynyn dáleldep, qolhat jazyp berýi mindeti. Qaıyrymdylyq sharasy uıymǵa múshe mıllıonerdiń tiri kezinde jáne ómirden ótkennen keıin de jalǵasa beredi. Búginge deıin Baffet pen Geıtstiń bastamasyna álemniń ár túkpirinen 150-den astam mıllıoner qosyldy. Olardyń arasynda Maıkl Blýmberg, Djordj Lýkas, Iýrıı Mıller, Devıd Rokfeller, Ted Terner, Vladımır Potanın, Rıfard Brenson jáne Mark Sýkerberg syndy ataqty baılar da bar. Elaman Qońyr. Derek: lifenews.ru. Sýret: gayrussia.eu.