Elordada «Qazaqstannyń kásipodaqtary: ınstıtýttyq reformalar jáne transformasııa» taqyrybynda «Ekspert» klýbynyń kezekti otyrysy ótti. Bul joly qoǵamda qyzý talqyǵa túsip otyrǵan transformasııa máselesine oraı kásipodaqtar federasııasynyń ókilderi pikir almasty.
Jıynǵa Temirjolshylar kásipodaǵynyń tóraǵasy Orazǵalı Ahmetbaev, «QazMunaıGaz» AQ kásipodaq tóraǵasy Sultan Qalıev, Energetıkter kásipodaǵynyń ókili Rústem Nurken, taǵy basqalar qatysty.
Memleket basshysy «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» atty tujyrymdamasynda bizdiń aldymyzǵa qoǵamymyzdy áleýmettik damytý deńgeıin arttyrý boıynsha aýqymdy maqsattar men mindetter qoıǵan bolatyn. Áleýmettik jańǵyrtý eńbek qatynastarynyń mádenıetin eseleýdi talap etetin bolǵandyqtan, elimizde kásipodaq qozǵalysyn jańǵyrtý barynsha batyl túrde júzege asýy tıis-aq. Bul rette Elbasynyń kásipodaqtar qozǵalysyna asa mán berip otyrǵandyǵy beker emes. Halyq pen bılikti baılanystyrýshy, negizgi mindeti qyzmet pen jumys berýshiniń arasynda týyndaıtyn máselelerdi ýaqytynda sheshý bolyp tabylatyn kásipodaqtyń róli bul aralyqta úlken ekendigin atap ótý shart. Sol sebepti, kásiporyndardyń kásipodaq uıymdary barlyq taraptarmen tyǵyz yntymaqtastyq ornatýy kerek. Aıtar bolsaq, qyzmetkerlerdiń eńbek quqyqtaryn qorǵaýǵa baǵyttalǵan áleýmettik dıalogtyń jańa nysandaryn damytý mańyzdy. Osyǵan oraı jıyn barysynda klýb jetekshisi Nurlan Erimbetov olardyń qoǵamdaǵy róli men jumys berýshi jáne jumysshy arasyndaǵy is-qımyl tetigi qalaı bolý qajettigi jóninde mamandarǵa suraq qoıdy. Sonymen qatar, jaqyn arada qozǵalyp jatqan, boljalynǵan Eńbek kodeksine túzetýler engizilýi múmkindigine baılanysty qyzmetkerler arasynda daý bolyp, tolassyz hattar joldanyp otyrǵandyǵyn qosa aıtty. Bul saýalǵa jaýap bergen kásipodaq ókili O.Ahmetbaev ózderiniń taraptan, ıaǵnı temirjolshylar arasynda bul máseleniń aıtarlyqtaı ózekti bolyp otyrmaǵandyǵyn aıtty. Degenmen, qazaqstandyq temirjolshylardyń jumys aptasy qysqaratyndyǵyn málimdedi. Bul rette endi olar 4 kúndik jumys kestesine kóshpek. Onyń aıtýy boıynsha, álemdegi kúrdeli ekonomıkalyq ahýalǵa baılanysty shoıyn jolmen tasymaldanatyn taýarǵa degen suranys azaıyp, tasymal salasynan túsetin qarjy kúrt kemigen. Sol sebepti, jumysshylardy qysqartpaı-aq, jumys ýaqytyn shegere otyryp, bul máseleniń sheshimi tabylǵandyǵyn tilge tıek etti. Bul rette S.Qalıev Eńbek kodeksiniń qıyn jaǵdaılarǵa baılanysty ózgertýdi talap etetindigin ataı otyryp, degenmen, onyń basty fýnksııasy múddelerdiń balansy bolýy qajettigin tuspaldady. Sonymen qatar, jańadan jasalynbaq Eńbek kodeksine «halyq tilegine qarsy» degen baǵasyn berdi. Onyń aıtýy boıynsha, ústeme eńbekaqy 1,25 koeffısıentine deıin tómendemeýi tıis. Al onyń kórsetkishi 1,5-2 bolyp qalýy qajet. Sondaı-aq, kásipodaq basshylary jumyskerlerdiń bul máseleni aýyr qabyldap otyrǵanymen asa teris jaǵdaılardyń joqtyǵyna sendirdi. Osy oraıda energetıkter kásipodaǵynyń ókili Eńbek kodeksindegi ózgertýler boıynsha jumystan shyǵarýǵa sebepterdiń 19 ben 26 aralyǵynda bolyp, ústeme eńbekaqynyń azaıtylýy qyzmetkerlerdiń kóńilinen shyqpaı otyrǵandyǵyn da jasyrmady. Bul oraıda jınalys barysynda Áleýmettik seriktestik ortalyǵy «Samuryq-Qazyna» AQ kásipodaq uıymymen birlese otyryp, eńbekkerlerdiń quqyǵy men múddelerine baılanysty máselelerdi qadaǵalap otyratyndyǵy sóz boldy.
Elmıra MÁTIBAEVA, «Egemen Qazaqstan».
