О́SKEMEN. 26 aqpan. Abaı Qunanbaıulynyń 170 jyldyǵy qarsańynda О́skemendegi A.Pýshkın atyndaǵy oblystyq kitaphanada S. Amanjolov atyndaǵy Shyǵys Qazaqstan memlekettik ýnıversıtetiniń professory Baýyrjan Erdembekovtyń bestomdyq ǵylymı eńbeginiń tusaýkeseri ótti. Bul týraly egemen.kz tilshisi habarlady.
Ǵalymnyń kóp jylǵy qajyrly zertteý eńbeginiń ishinde 10 jyl boıy zerttelip, 2008 jyly basylǵan «Abaıdyń ádebı ortasy» monografııasynyń arab qarpindegi nusqasy bar. Bul eńbek ótken jyly jaryq kórip, qyrkúıek aıynda Qytaıdyń Beıjiń qalasyndaǵy Ortalyq ulttyq ýnıversıtette tanystyrylǵan bolatyn. Mundaǵy avtordyń maqsaty – Qytaı, Túrkııa, Mońǵolııada turatyn qandastarymyzdyń abaıtanýǵa baılanysty ǵylymı qyzyǵýshylyqtaryn oıatý.
Kelesi jyly Abaıdyń kórnekti shákirtteriniń biri, qazaq ádebıeti tarıhynyń ózindik bir bıigi – Árip Táńirbergenulynyń týǵanyna 160 jyl tolady. Osy oraıda B.Erdembekov «Árip aqyn», «Alashtyń aqıyǵy – Árip qyran», «Bul óleń shyqqan eken birtalaıdan...» jáne avtor qurastyrǵan «Árip Táńirbergenulynyń «Shyǵarmalary» kitaptaryn oqyrman qaýymǵa usyndy. Qazirgi tańda Árip aqynnyń ádebı murasy jańasha paıymdaýlar turǵysynan jan-jaqty, tereń zertteýdi qajet etedi. Ǵalymnyń Árip aqyn men onyń shyǵarmashylyǵyna arnaǵan ǵylymı eńbekteri osy olqylyqtyń ornyn toltyryp otyr.
B.Erdembekov – 200-ge tarta ǵylymı baıandamalar men ǵylymı-tanymdyq maqalalar, sonymen qatar, 2 monografııa, 1 oqýlyq, 6 oqý quraly, 2 oqý-ádistemelik nusqaýdyń avtory.
Jıynda oblystyq ishki saıasat basqarmasynyń basshysy Erbol Nurǵalıev, «Shyǵys-aqparat» JShS dırektory Nurjan Qýantaıuly, fılologııa ǵylymdarynyń doktory Aıjan Kartaeva jáne jazýshy-jýrnalıst Aıtmuhamed Qasymov avtordyń irgeli izdenisi jónindegi tushymdy oı-pikirlerimen bólisti. Sonymen birge, fılologııa ǵylymdarynyń doktory B.Erdembekov óziniń kóp jylǵy ǵylymı eńbegi jóninde keńinen áńgimelep, oqyrmandardyń saýalyna jaýap berdi.
Dýman Anash.
Derek: egemen.kz.
Sýret: ShQO Aqparattyq ortalyǵy.
