Ataqty Stıven Sıgal

Astanadaǵy jas órenderdi aıkıdoǵa baýlýda Ataqty kıno akteri, rejısser Stıven Sıgal Astanaǵa keldi. Ol elorda kúnine oraı ótetin I halyqaralyq jaýyngerlik óner festıvaline qurmetti qonaq retinde qatysady. Sapar aıasynda Gollıvýd juldyzy astanalyq jas órenderge aıkıdo sportynyń qyr-syryn úıretti. Aldymen Stıven Sıgal Astana ákimi Ádilbek Jaqsybekovpen kezdesti. Shahar basshysy qonaqqa elordamyzdyń tarıhy, qala kúni­niń jalpyhalyqtyq sıpatqa ıe bolǵan merekege jáne barsha qa­zaqstandyqty bir maqsat pen múdde jolynda uıystyryp otyrǵan rýhanı kúshke aınalǵanyn aıtyp berdi. Kezdesýden keıin Á.Jaq­sybe­kov qonaqty Astanadaǵy Oqýshylar saraıyna bastap keldi. Ol jerde Stıven Sıgal jaýyngerlik ónerdiń ádis-tásilderi boıynsha sheberlik sabaǵyn ótkizdi. Oǵan 70-ten astam jas sportshy qatysty. Qazaq ulandarynyń sportqa degen qyzyǵýshylyǵyna rıza bolǵan akter: «Sizdiń elde aıkıdoǵa jas balalardyń qyzyǵýshylyq deńgeıi osynshalyqty joǵary dep oılamappyn. Jalpy, qazaq halqynyń jekpe-jek ónerinde ózindik orny bar ekenin bilemin. Degenmen, aıkıdo kóp halyq úshin jat ekeni jasyryn emes. Soǵan qaramastan, aldyma kelgen jetkinshekterdiń kóptigin kórip qýanyp turmyn. Balalar – bizdiń bolashaǵymyz. Meniń qazir úıretetin ádisterim olardyń ómirde durys jol tań­daýyna septigin tıgizedi. Sondaı-aq, kez kelgen jaǵdaıda óz-ózderin qorǵaı alatyn, óz kúshine senimdi tulǵa bolyp qalyptasýyna da aıkıdonyń bereri mol», – dedi. Sonymen qatar, dańqty akter jetistikke jetý úshin ne qajet ekenin aıtyp berdi. «Alǵa qoıǵan maqsatqa jetý úshin ártúrli joldan ótýge týra keledi. Alaıda, bul jolda jal­qaýlyq pen salǵyrttyqqa oryn joq. Tek tártip pen tabandylyqtyń arqasynda ǵana kózdegenińe qol jetkizýge bolady. Men sizderge bilgenimdi úıretip, ómirden óz oryndaryńyzdy tabýlaryńyzǵa sep bolǵym keledi. Eń bastysy, batyl bolyńyzdar. Namys pen rýhtyń qaınar kózi – ult pen Otandy shyn súıseńizder, bári siz oılaǵandaı bolady. Endeshe iske sát!», – degen Stıven Sıgal tatamıge shyǵyp, aıkıdo óneriniń ádisterin úırete bastady. Jattyǵý barysynda Sıgal shákirtterine ózderin erkin ustaýǵa múmkindik berdi. Jekpe-jek kezin­degi basty qaǵıda jóninde ol: «Kilemdegi jaǵdaıdy óz baqy­laýyń­nan shyǵarmaýǵa tyrysý kerek. Odan bólek, qarsylasty ózińe tym jaqyn jiberýge jáne onyń tý syrtyńnan shabýyldaýyna múmkindik berýge bolmaıdy. Degenmen, mundaı tyǵyryqtan da shyǵar jol bar. Sebebi, kez kelgen shabýylǵa qarsy qoldanatyn qarymta ádister bolady», – dep birnesheýin kórsetti. Shara sońynda akter Qazaqstan, Astana týraly pikirin bildirip: «Maǵan Astana unaıdy. Ásem, sulý qala. Aldaǵy ýaqytta mindetti túrde qaıtyp oralamyn», – dedi. Osy rette, bul onyń Astanaǵa ekin­shi ret kelýi ekenin aıta ke­teıik. Buǵan deıin Sıgal 2011 jy­­ly dástúrli ekshn-fılmder kıno­festıvaline kelgen edi. Áıgili mamannan dáris al­ǵan jas aıkıdoshy Danıel Áýbákirov: «Jasy 60-tan asqa­nyna qaramastan, óte shıraq qı­myldaıdy. Bizge buryn-sońdy bilmeıtin ádisterdi úıretti», – dep, qonaqtyń sheberligine tánti bolǵanyn aıtty. Búginde 63 jasqa kelgen Stıven Sıgal 50-ge jýyq Gollıvýd fıl­mine túsken. Jeti jasynan beri aıkıdomen aınalysatyn ol bul jekpe-jek túrinen VII dan ıegeri. Atalǵan sporttyń qyr-syryn tolyq meńgerý úshin 20 jyl Japo­nııada turǵan. Sóz sońynda Astanada ótetin I halyqaralyq jaýyngerlik óner festıvaline toqtalyp óteıik. Elorda kúnine oraı alǵash ret uıymdastyrylyp otyrǵan sharaǵa 12 jekpe-jek túri boıynsha jo­ǵary dárejeli belbeý men dan ıegerleri qatysady. Olardyń arasynda Qazaqstannan bólek, AQSh, Qytaı, Reseı, Chehııa, Ońtústik Koreıa jáne Japonııadan kelgen sheberler bar. Elaman QOŃYR, «Egemen Qazaqstan».