Qytaıda jol apatynan elimizdiń 2 azamaty qaza tapty

ASTANA. 27 naýryz. Qytaıda Qazaqstan azamattary mingen avtobýs apatqa ushyrap, 2 adam mert boldy. Bul týraly mail.ru habarlady. Budan bólek, avtobýstaǵy 19 azamat túrli jaraqatpen aýrýhanaǵa jetkizilgen. Bulardyń arasyndaǵy 6 adamnyń jaǵdaıy aýyr. Japa shekkenderdiń deni Qazaqstan azamattary. Jol-kólik oqıǵasy Qytaı jerinde oryn alǵan. Avtobýs osy eldiń kompanııasyna tıesili. Kýágerlerdiń sózinshe, avtobýs joldyń qarsy betine shyǵyp, jeńil mashınamen soqtyǵysqan. Eki otandasymyz sol jerde qaza tapqan. Al 19 adam Zımýnaı eldi mekenindegi aýrýhanaǵa jatqyzyldy. Arasynda Qytaıda bilim alyp júrgen stýdentter de bar kórinedi. Zardap shekkender avtobýs ıeleriniń áreketine narazy. Aıtýlarynsha, kólik kompanııasynyń ókili eshbir aýdarmashysyz áldebir qujattarǵa jolaýshylardyń qolyn qoıǵyzbaq bolyp júr eken. Semeı qalasynyń turǵyny, jol apatynan zardap shegiýshi Qurmangúl Orazbaeva: «Kúnde bir qaǵazdardy alyp kelip qol qoıyńdar dep mezi etti. Qytaı tilin shala-sharpy biletin bireý oqyp edi, onda «bar jaýapkershilik jolaýshylarǵa júkteledi» dep jazylǵan eken. Bizdiń úkimet tarapynan járdem bolsa deımiz. Aýdarmashy men zańgerdiń kómegi kerek», deıdi. Aıta keteıik, avtobýs Semeıden Úrimshige baǵyt alǵan eken. Joldybaı Bazar. Derek, sýret: mail.ru.