Áleýmettik jelini belsendi paıdalanatyn ortaǵa Ańsaǵan Mustafa esimi jaqsy tanys. Onyń alǵashqy sýretteri aldymen áleýmettik jelilerde jarııalandy. Qazirgi qoǵam dertin dóp basyp, aınalada bolyp jatqan turmys túıtkilderin búkpesiz jetkizgen shynaıy týyndylar birden jurtshylyq nazaryn aýdaryp, el arasyna keńinen taraldy.
Elimizdiń iri qalalarynda Ańsaǵannyń tereń syrǵa toly sýretteri kópshilikke oı tastaý maqsatynda ilinip tur. Kópshiliktiń kókeıindegisin dálme-dál sýrettegen «Áke, balańa kóńil ból!», «Ana, temeki tartpa!», «Qarttar úıinde qazaq kóp», «Qorqam, áke, urmashy...», «Tazalyq», «Ary baryp oına!», «Urys tek balaǵa zııan», «Uıada ne kórseń, ushqanda sony ilersiń» syndy kóptegen áleýmettik ıllıýstrasııa legin kórmegen adam kemde-kem bolar.
Ańsaǵan Atyraý oblysynyń Mııaly aýylynda dúnıege kelgen. Almaty qalasyndaǵy kórkemsýret kolledjin támamdaǵan ol keıin T.Júrgenov atyndaǵy Qazaq ulttyq óner akademııasynda grafıkalyq dızaın mamandyǵyn meńgerdi. «Beıneleý ónerine bet burýyma jazýshy ákem men jýrnalıst anam yqpal etti deýge bolady. Bala kezimde anam Sholpan Uǵybaıqyzy «Aq bosaǵa» atty gazet shyǵardy. Meni ylǵı janyna ertip júretin. Redaksııada jýrnalıst aǵa-ápkelerdiń áńgimesin tyńdap, sonyń jelisimen sýret salatynmyn. Keıin bul ádetim shynaıy ónerge ulasty. Alǵashqy sýretterimdi áleýmettik jelilerge júktedim. Onda da qalamgerler, jýrnalıster ártúrli ıdeıalaryn usynyp, túrli áleýmettik taqyrypqa qalam tartýyma túrtki boldy» deıdi óner ıesi.
Bolmysy bólek, oıy astarly sýretshiniń qylqalamynan týǵan dúnıelerdi úsh topqa jikteýge bolady: ana men bala, telefonǵa telmirgen urpaq, máńgi mahabbat taqyrybyna arqaý bolǵan san qıly taǵdyr.
Onyń qaı sýretin alsańyz da zaman tynysyn, zamandas kelbetin kóresiz. Ýaqyt aǵymyna saı ózgergen adam psıhologııasyndaǵy erekshelikti aınytpaı beınelengenine kýá bolasyz. Qazirgi qoǵamnyń taram-taram minezin tap basý, ıdeıany áleýmettiń ózinen izdeý, ony boıamasyz kúıde kópshilikke jetkize bilý – sýretshiniń basty ereksheligi bolsa kerek. Jurtshylyq Ańsaǵannyń shynaıy shyǵarmalaryn jyly qabyldaıtyny da sondyqtan.
A.Qurmanǵazyqyzynyń shyǵarmashylyǵyna oralýymyzdyń ózindik sebebi bar. 17 sáýir kúni Astanadaǵy Ulttyq mýzeıde qylqalam ıesiniń «Sóıle, sýret!» atty áleýmettik taqyryptarǵa arnalǵan kórmesi ótedi. Bul rýhanı is-shara Ańsaǵannyń shyǵarmashylyǵyndaǵy mańyzdy beles deýge bolady. 2014 jyldan bastaý alǵan kórme elimizdiń barlyq qalasyn aralap, keıin shet memleketterde jalǵasyn tapty. Osylaısha, sýretshiniń tańdaýly týyndylary álemniń 30-dan astam elin aralap, ónersúıer qaýymnyń yqylasyna ıe boldy.
Al elordadaǵy kórme – osy shyǵarmashylyq sapardyń jalǵasy ispetti. Bul – sýretshiniń 200-kórmesi eken. Munda avtordyń keńinen tanylǵan dara shyǵarmalary qoıylady. Bir adamnyń emes, tutas qoǵamnyń bet-beınesin kórsetýge tyrysqan sýretshiniń kórmesinde ata-ana men bala arasyndaǵy qarym-qatynastyń osal tustary, qıly taǵdyrlar toǵysy, kúıbeń tirshilik túıtkilderi men tehnologııaǵa táýeldilik taqyryptary aıshyqtalmaq. «Elordalyq kórermenge ózimniń eń keń taralǵan týyndylarymdy usynbaqshymyn. Árbir sýretimniń aıtary bar. Bári de kúndelikti ómirden alynǵan kórinister. Jalpy, men qazaq qoǵamynyń – úreısiz, ár adamnyń júregi ýaıymsyz bolǵanyn qalaımyn. Týyndylarym arqyly kókeıimde júrgen osy arman-maqsatymdy jetkizgim keldi», deıdi sýretshi.
О́nerdiń mıssııasy – rýhanı ásemdik syılaý ǵana emes, kórgen adamǵa oı salý. Endeshe, sýretshi-ıllıýstrator Ańsaǵan Mustafanyń bas shahardaǵy kórmesi kópshilikti óz ómirine, aınalasyna syn kózben qaraýǵa, kem-ketiktiń ornyn toltyrýǵa úndeıtin, jaqsy ózgeriske jeteleıtin taǵylymy mol shyǵarmashylyq kesh bolatynyna senim mol.
