Is-shara aıasynda Jazýshylar odaǵy basqarmasy tóraǵasynyń orynbasary Beıbit Sarybaı, Qazaqstannyń eńbek sińirgen qaıratkeri, jazýshy Sáýle Dosjan, aqyn Baqytjan Tobaıaqov, balalar jazýshysy Qanat Qaıym syndy qalamgerler sóz sóılep, jańa kitaptyń oqyrmany kóp bolýyn tiledi.
Sondaı-aq tusaýkeser barysynda otbasy qundylyqtaryn dáripteý, ulttyq ádebıet pen mádenıetke degen súıispenshilikti arttyrý, óskeleń urpaqqa rýhanı tárbıe berý syndy máseleler qozǵaldy. Máselen, Muhtar Áýezov atyndaǵy Ádebıet jáne óner ınstıtýtynyń aǵa ǵylymı qyzmetkeri, PhD E.Qýatbek, Ál-Farabı atyndaǵy QazUÝ-dyń magıstranty A.Bektursyn jazýshynyń shyǵarmashylyǵy jóninde baıandama jasap, Nurdáýlet Aqyshtyń «Momaqan qyz» týyndysy adam boıyndaǵy jaqsy qasıetterdi baǵalaýǵa úıretetinin tilge tıek etti.
Tusaýkeserge kelgen qonaqtar qalamgerdiń «Momaqan qyz» shyǵarmasynyń oqıǵasy tartymdy, tili jeńil ekenin, jazýshy jas qyzdyń minezi, tárbıesi, ómirge kózqarasy arqyly adamgershilik pen qarapaıymdylyqty nasıhattaǵysy keletini týraly oılaryn ortaǵa saldy.
Sonymen qatar Júsipbek Elebekov atyndaǵy estrada-sırk kolledj stýdentteri arnaıy konserttik baǵdarlama uıymdastyryp, kóńildi keshtiń shyraıyn keltirdi.
