Sizdiń balańyz mektepke daıyn ba?

Áne-mine degenshe jańa oqý jyly da bastalyp, bala bitken kerek-jaraǵyn arqalap mektepti betke alady. Osy oraıda oqýshynyń joǵyn túgendeıtin «Mektepke jol» aksııasynyń bastalǵanyna da birshama ýaqyt boldy. Sodan beri Qaraǵandy oblysy boıynsha jaqsy sha­rýalardyń basy qaıyryldy. Sondaı sharanyń biri «Murager» mamandandyrylǵan mektep-ınternatynda ótti. Munda oblystyq bilim berý basqarmasy men «Nur Otan» partııasy oblystyq fı­lıalynyń ókilderi bas qosyp, qoly qysqa otbasylarynyń balalaryna oqý qural-jabdyqtaryn tabys etti.

Sonymen qatar, «Murager» mektebinde «Mektepke jol» aksııasynyń basty qaharmandary – áleýmettik jaǵynan az qamtyl­ǵan otbasylardyń balalary ǵana emes, estý qabileti nashar jáne aıaq-qoldary kem balalarǵa da qaıyrymdylyq kómekteri kórsetildi. «Balalarǵa bárimiz kómekteseıik!» degen uranmen ótken bul shara barysynda ba­laqaılar oqý quraldary men syzǵysh, qalam, boıaý, qaryndash sekildi kerek-jaraqqa da qaryq boldy, túrli jumsaq oıyn­shyqtardy da syıǵa aldy. Elimiz boıynsha 1 tamyzdan bastalǵan «Mektepke jol» aksııasy 30 qyrkúıekke deıin jalǵasady. Bul ıgi shara jańa oqý jylyna ázirlik barysynda balalarǵa materıaldyq kómek kórsetý maqsatyn kózdeıdi. Jal­py, atalǵan aksııanyń bereri mol. Qazirgi tańda bul kezeń aıa­synda ótetin jappaı oqý boıynsha aılyqtar, «Eńbekpen qamtý» jáne «Túngi qaladaǵy balalar» reıdteri, kómek qabyl­daý be­ket­terin ashý syndy ońdy sharalar dástúrge aınalyp úlgerdi. Budan bólek, kásip­ker­lerdi qatystyra otyryp tómengi baǵamen keńse taýarlaryn satý úshin mektep ja­nyndaǵy jármeńkelerdi uıym­dastyrý isi de keńinen etek jaıyp keledi. Oblystyq bilim berý basqarmasy janynan tur­ǵyndarǵa arnalyp jedel tele­fon jelisi uıym­das­tyryl­ǵan. Sonymen qatar, bilim basqarma­synyń saıtynda «Sizdiń balańyz mektepke daıyn ba?» atty aqpa­rattyq aksııa da bastaldy. Munyń ózi bizdiń óńir balala­rynyń taǵy da qandaı muq­taj­dyqtary barlyǵyn der kezinde bilip otyrýǵa múmkindik beredi.

Jalpy, jyl saıyn Qaraǵan­dy oblysyndaǵy osy taqylettes aksııalarǵa aýdandyq, qalalyq bilim bólimderi, úkimettik emes uıymdar, qoǵamdyq qorlar, kásiporyndar jáne jekelegen mesenattar kóptep qatysady. Ásirese, «Mektepke jol» aksııasyna Abaı, Jańaarqa, Buqar jyraý, Qarqaraly, Nura aýdandary men Qaraǵandy, Balqash, Sátbaev jáne Temirtaý qalalary belsendi túrde at-salysady. Joǵaryda atalǵan óńirlerdegi pedagogtar men mektep ákimshilikteri, aýdandyq jáne qalalyq bilim bólimderiniń basshylary aksııaǵa kóptegen demeýshilerdi tartyp, sonyń nátıjesinde muqtajy kóp birtalaı balaǵa kómek qolyn soza aldy. «Sońǵy jylda aksııa aıasynda 25 myńnan astam balaǵa kómek bere aldyq. Bıyl da mektepke daıyndyq máselesine qoǵam nazaryn aýdaryp, birtalaı sharýa­ny tyndyrýdy kózdep otyrmyz», – dedi oblystyq bilim berý basqarmasy basshysynyń orynbasary Baqytgúl Ádekenova. «Mektepke jol» aksııasynan bólek, bıylǵy jyldyń tamyz aıynda «Bolashaq» aksııasy da bastaý alǵan. Bul ıgi bas­tama Májilis depýtattarynyń muryndyq bolýynyń arqasynda ómirge keldi. Aksııa aıasynda arnaıy qamqorlyqqa alynǵan balalarǵa arnalǵan bilim berý esepshottary ashylǵan. «Nur Otan» partııasynyń oblystyq fılıaly tóraǵasynyń birinshi orynbasary Qadısha Ospanovanyń aıtýynsha, atalǵan aksııa jyl sońyna deıin jalǵasady. Sondaı-aq qaraǵandylyq nurotandyqtar «Baqytty balalyq» jobasy aıasynda da belsendi túrde jumys isteıdi. Olar az qamtylǵan otbasylarynan shyqqan balalardy qoǵamdyq jáne mádenı ómirge aralastyryp, jan-jaqty kómek pen qoldaý kórsetedi. Aksııaǵa qatysyp, qysqa jibi kúrmeýge kelmeıtin otba­sy­lardyń babalaryna kómek qolyn sozý – árbir azamattyń jeke sharýasy. Keıingi jyldary mun­daı ıgi sharaǵa qatysýǵa nıet bildir­genderdiń qatary molaıyp keledi. Qýanarlyq, quptarlyq úrdis.

Qaırat ÁBILDINOV, «Egemen Qazaqstan».

QARAǴANDY. –––––––––––––––– Sýretti túsirgen Dmıtrıı Kýzmıchev.