Sýret: aqshamnews.kz
Kóńil qulazyp, jan jabyrqap tur. Keshe ǵana qatar júrgen, aramyzda júre beretindeı kóringen qos tulǵanyń birinen keıin biri attanýy ómirdiń ótkinshi ekenin sezindirdi. Ekeýin toǵystyrǵan ortaq qasıet – halyqqa degen sheksiz súıispenshilik pen ónerge degen adaldyq. As-aǵa teatrdan shettep ketkende aramyzǵa qosyp, qara shańyraqqa qaıta oralýyna sebepshi bolǵan da Esmuhan aǵa edi. As-aǵadan uzaq ýaqytqa ajyraǵysy kelmegendeı, maýsym aıynda tolar 85 jas mereıtoıyna da qaraılamaı, zamandasynyń sońynan kete bardy.
Es-aǵa – sanaly ǵumyryn sahnaǵa arnaǵan, teatr ónerin tirshilik kózine aınaldyryp, ult rýhymen ushtastyrǵan tulǵa. Aǵanyń eńbek jolyna kóz júgirtsek, qaıratkerlik bolmysy aıqyn kórinedi. Uzaq jyldar boıy Semeı teatryn basqaryp, ósip-órkendeýine ólsheýsiz úles qosty. Jıyrma jyl boıy tabandy eńbek etip, teatrdy jańa deńgeıge kóterdi, kórermenniń yqylasyna bólengen rýhanı ordaǵa aınaldyrdy. Bul – uıymdastyrýshylyq qabilettiń myqtylyǵy, ónerge degen shynaıy janashyrlyqtyń belgisi. Al 2001–2013 jyldar aralyǵynda qazaq óneriniń qara shańyraǵyn basqarýy – onyń kásibı biliktiliginiń óskeniniń, bedeliniń bıiktegininiń dáleli.
Esmuhan Obaev – on úsh jyl boıy Muhtar Áýezov atyndaǵy akademııalyq teatrdyń ujymyna jetekshilik etip, ulttyq teatr óneriniń damýyna óz qoltańbasyn qaldyra alǵan jan. Bul kezeńde de ol shyǵarmashylyq izdenisin toqtatpaı, sahna mádenıetiniń bıikteýine yqpal etti. Es-aǵa tek basshy emes, ol – ustaz, ol – tárbıeshi, ónerdiń janashyry edi. Onyń tárbıesin kórgen jas akterler men rejısserler búgingi tańda qazaq sahnasynyń maqtanyshyna aınaldy. О́zderi de «Obaevtyń shákirtterimiz» degendi maqtanyp aıtady.
Es-aǵa sábıdeı sengish, baladaı ańǵal, ańqaýlyǵy da bar, ózine ǵana jarasatyn erekshe minezdiń ıesi-tin. Qarapaıym edi, sonysymen uly edi. Kúni keshe ǵana ortamyzda júrgen jaıdary adam týraly «edi...» dep ótken shaqta jazý qandaı aýyr! Ol As-aǵany jalǵyzsyratqysy kelmedi me eken?
Jańa qoıylymdardy kórýge teatr zalynyń ortasymen asyqpaı, aıańdap kep kórermen arasyndaǵy óz oryndaryna jaıǵasatyn, qaýqyldasa kórisip, ádemi ázilderimen qaǵysa jónelip, keńkildeı kúletin Esmuhan aǵanyń beınesi eshqashan kóz aldymyzdan ketpes! Qosh, asyl aǵa!
Bekjan TURYS,
akter
