Kóshet – kóshe kórki

«Qazhrom» TUK» AQ-tyń fılıaly – Aqtóbe ferroqorytpa zaýyty qorshaǵan ortany qorǵaý basqarmasynyń ıgi bastamasymen «Qazhromnyń» álemde teńdesi joq jańa ferroqorytpa zaýytynyń aýmaǵyna 200 túp pıramıdalyq terek aǵashyn otyrǵyzdy. Metal­lýrgterdiń qolymen otyrǵyzylǵan aǵash kóshetteri jańa kásiporynnyń kórkine kórik qosyp, jasyl jelekke bóleıtin bolady. Jańa ferroqorytpa zaýytynyń aýmaǵyna aǵash otyrǵyzý sharasyna 100-ge jýyq zaýyttyqtar belsene qatysty. Kóshet otyrǵyzatyn oryn­dardy energoseh, hımııalyq saraptama zerthanasynyń, qoı­ma sharýashylyǵynyń jáne №4 balqytý sehy ujymynyń kóme­gimen aldyn ala qazylyp, oǵan qajetti qural-saımandar daıyn­dalyp qoıyldy. Jaqsy kóterińki kóńil kúımen jınalǵan zaýyttyqtar Uly Jeńistiń 70 jyldyq mereıtoıdyń qurmetine otyrǵyzylǵan pıramıdalyq terekter álemde teńdesi joq jańa zaýytqa erekshe sán berip, metallýrgterdiń úzilis kezinde kóleńkesin saıalaıtyn oryndarynyń birine aınalatynyna senimdi. – Elbasy Nursultan Nazarbaev Qazaqstan halqy Assambleıasynyń sessııasynda: «Biz elimizdi japy­raǵy qýramaıtyn, tamyry sýalmaıtyn, kórgen jan tamsanbaı tura almaıtyn Máńgilik ja­syl elge aınaldyrýymyz kerek», dep atap kórsetken bolatyn. Buǵan úles qosýdy metallýrgter ózderiniń azamattyq paryzy dep sanap, jyl saıyn zaýyt aýmaǵyn kógaldandyryp, abattandyryp otyrýdy daǵdyǵa aınaldyryp keledi. Jyl saıyn «Men aǵash otyrǵyzdym», «Aǵash otyrǵyz» aksııasy aıasynda bul ıgi is óz jalǵasyn tabýda. Jaqynda ǵana oblystyq ekologııa departamentiniń bastamasyn qoldaǵan zaýyttyqtar Aqtóbe qalasyndaǵy №12 shaǵyn aýdanynda boı kótergen balalar alańyna ózderiniń qoltańbalaryn qaldyryp, kásiporyn atynan Jeńistiń 70 jyldyq mereıtoıyna oraı 70 túp terek kóshetin otyrǵyzyp, qala turǵyndaryna qýanysh syılady. Jańa zaýyt aýmaǵynda otyrǵyzylǵan bul kóshetterdiń jaıqalyp jasyl jelekke aınalýy úshin kútip baptaý, sýarý jumystary zaýyt jumyskerlerine júktelgen, – deıdi Aqtóbe ferroqorytpa zaýy­ty qorshaǵan ortany qorǵaý basqarmasynyń basshysy Tatıana Samoılenko. Árdaıym jaqsy isterdiń uıyt­qysy bolyp júretin metal­lýrgterdiń osyndaı ıgi sharalarda belsendilik tanytqany bizdi de qýantty. Zaýyttyqtar «Atadan mal qalǵansha, tal qalsyn» degen halyq naqylynyń shynaıy kórinisin kórsetip, ózgelerge úlgi bolýda. Metallýrgterdiń ónegesin óńirdegi ózge kásiporyndar da ilip áketip, jas kóshetter otyrǵyzýǵa kirisip ketti. Satybaldy SÁÝIRBAI, «Egemen Qazaqstan». Aqtóbe oblysy.