Konstıtýsııalyq zańnyń negizgi maqsaty – Alataý qalasynyń qarqyndy ári ornyqty damýy úshin jaǵdaı jasaý.
Qalanyń erekshe quqyqtyq mártebesine saı ınnovasııalar, ınvestısııalar jáne ekonomıkalyq ósim úshin qolaıly orta qurýǵa baǵyttalǵan derbes ekojúıeni qalyptastyrýdy kózdeıtin túbegeıli jańa tásilder qoldanylady.
Konstıtýsııalyq zańǵa sáıkes, qalany memlekettik basqarýdyń jańa modeli engizildi. Atap aıtqanda, kásipkerlik, keden isi, sıfrlyq aktıvter, qumar oıyndary, áleýmettik sala, qarjy naryǵy, arhıtektýra men qala qurylysy, ekologııa ári qorshaǵan ortany qorǵaý, mádenıet, sport jáne taǵy basqa salalardy retteýdiń negizgi qaǵıdalary belgilendi.
Qasym-Jomart Toqaev: Alataý qalasy jańa ınvestısııalyq kezeńniń negizgi jobasy bolýǵa tıis
«Alataý rezıdenti» quqyqtyq mártebesi bekitildi. Arnaýly mártebeni ákimshilik birqatar sanat boıynsha jeke jáne zańdy tulǵalarǵa beredi. Arnaıy rejımniń qoldanylý kólemi men tıisti quqyqtar, mindetter men talaptar osy rezıdent mártebesine qaraı anyqtalady.
Shahardyń uzaq merzimdi ınvestısııalyq jáne tehnologııalyq órkendeýi strategııalyq qujattar negizinde qamtamasyz etiledi. Naqty aıtqanda, Alataý qalasynyń uzaq merzimdi damý jospary, master-jospary jáne damytý strategııasy qabyldanady.
Alataý qalasynyń qaýipsizdigin, sondaı-aq «aqyldy qala» retinde tıimdi jumys isteýi men damýyn qamtamasyz etý maqsatynda ınfraqurylym nysandary men qoǵamdyq qaýipsizdikti qamtamasyz etý júıeleriniń barlyq deregi biryńǵaı sıfrlyq basqarý platformasyna biriktiriledi.
Sonymen qatar qalanyń ınvestısııalyq klımaty men ınvestorlarǵa beriletin kepildikteri, salyq-bıýdjet saıasaty, dızaıny men jer qatynastary atalǵan konstıtýsııalyq zań aıasynda retteledi.
