KО́KBASTAÝDAǴY DÚBIRLI BÁIGE

JETISÝLYQTAR ASTANA MEREKESINE ARNALǴAN JARYS JALAÝYN JELBIRETTI HHI ǵasyrdyń ǵajaıyby – elordanyń týǵan kúnin oblystyq at sporty federasııasy respýblıkalyq “Birligimiz jarasqan!” aksııasy aıa­synda uıymdastyryp, “Táýelsizd­i­gimizdiń boıtumary – ásem Astana” mereıi Jambyl aýdanyndaǵy “Kókbastaý” atshabarynda jalǵasty.Kók shalǵyny men qyrmyzy gúli belden keletin beles-bel aq jaýyn­nan soń túrlene túsken. Aýyzdy­ǵy­men alysqan qazmoıyn, tulpar­lar­dyń tizginin tartqan shabandozdar dúbirli sátti asyǵa kútken. Jarysqa elimizdiń barlyq ob­lys­tarynan jáne Reseı men Qyr­ǵyzstannan 224 sáıgúlik qatysyp, qaltaly azamattar tikken 7 avtokólik sarapqa salyndy. Kókbastaýdyń kókoraı shalǵyn­dy belesine jankúıerler ádettegideı kóp jınalyp, dúbirli sáttiń shy­raıyn kirgizdi. Tóbeden bastap, etekke deıin aqshańqan kıiz úıler tigilse, ulttyq naqyshpen órilgen bas­qury men belbeýi, úzigi men jel­baýy, sheber qoldan shyqqan qy­zyldy-jasyldy tuskıiz ben tekemet kóz qyzyqtyrady. Alǵashqydaǵy jarys jolyndaǵy top báıgege 67 tulpar qosyldy. Báı­ge dese delebesi qozatyn halyqpyz. Jel­men jarysqan Qambar ata túli­gin qurmettegen kópshilik óz baı­lamdaryn aıtyp, oǵan qıqý qosty. “Júırikten júırik ozar ja­rysqanda” dep beker aıtylmaǵan. Bir-birimen irkes-tirkes shyqqa­ndar­dyń birte-birte aralary alshaqtaı berdi. Nátıjesinde, 15 shaqyrymdyq top báıgede aldyna jan salmaǵan Shyǵys Qazaqstannan kelgen Izbasar pyraǵynyń baǵy janyp, júldeli bolsa, aýzymen qus tistegen Jambyl oblysynyń Krısmı tulpary bul joly ekinshi oryndy mise tutty. Jylqyda da jylqy bar, qaza­­­naty bir bólek, degen. Báıgedegi qunan jarysynyń ózindik orny bar. Sodan da bolar, atbegiler quly­ny­nan bastap, baby men baǵyn sy­naı­tyn shaǵyndaǵy osy dodaǵa bir úmit, bir kúdikpen at qosady. Kókbastaý jazyǵyndaǵy jarys elordanyń toıy – eldiń toıy ekenin taǵy bir qyrynan tanytyp, 11 shaqyrymdyq qunan báıgege qosylǵan 57 tul­par­dyń arasynan Qarasaı aýdanynyń Jıreni máre syzyǵyn birinshi bo­lyp qıdy. Al, 9 shaqyrymǵa sozy­l­ǵan jorǵa jarysynda baıqaǵany­myzdaı, at sportynyń bul túrine qo­sylatyndar qatarynyń kóp emes­tigi. Desek te, sý tógilmes jorǵa jarysynyń ózindik tártibin qatań saqtap, aınalym saıyn shabysynan jańylmaǵan qordaılyq Tahmına birinshi, Qyrǵyzstannan kelgen sáıgúlik ekinshi orynnan kórindi. Jankúıerler taǵatsyzdana kút­ken alaman báıge de bastaldy. At­sha­bar alańy mýzyka sazymen órilip, 21 shaqyrymdyq jarys jolyna shyqqan­dardyń mereıin tasytty. Kileń ataǵy alysqa ketken tulpar­lar men pyraqtar. Osy mekendegi dodaly básekede árdaıym bapkeriniń baǵyn jandyrǵan tulparlar qatary da mol. Desek te, básekeniń de jul­dyzdy shaǵy bolady. Bul joly qa­rasaılyq Bolat Ábish­u­lynyń Pokeri 79 attan oq boıy ozyp, máreden juldyzdaı aǵyp ótip, bas báı­gege tigilgen “Djıp” avtokóligin ıesine syılasa, sońǵy aınalymǵa deıin top bastaǵan ilelik Zákit júırigi ekinshi, astanalyq Insýlla arǵymaǵy úshinshi keldi. Ulttyq at sporty jarysynda Qa­zaqstan Respýblıkasy ulttyq oıyndar qaýymdastyǵynyn prezı­denti Qaırat Satybaldy sóıledi. – Arqadaǵy Astana merekesin Jetisý jurty at shaptyryp, kókpar tartyp, dúrkiretip atap ótti. Je­ńimpazdar jeńisterin elordaǵa ar­nady. Jalpy, qazaqta atpen baı­lanysty sporttyń 50-ge tarta túri bar. Biraq, onyń bári birdeı damyp otyr deı almaımyz. Keleshekte osy máseleler eskeriletin bolady, – dedi ulttyq oıyn janashyry. – Saryarqa tórindegi ulttyq rýhtyń boıtumary – Astana Mem­le­ket basshysy Nursultan Na­zar­baev­tyń qoltańbasy, ushqyr ıdeıasy men jasampaz eńbeginiń jemisi, – degen Jambyl aýylynyń turǵyny, eńbek ardageri Janat Turapov óz oıyn ári qaraı bylaısha sabaqtady. – Elor­danyń sımvo­lyn­daı bolǵan Báıterek, “Qazaq eli” monýmenti, Kereı men Jánibek handarǵa arnalǵan, basqa da tarıhı tulǵa­lardyń aıbyndy eskert­kishteri, sáýletti keshenderi – eldi­gi­mizdiń nyshany. Kópshilik qyz qýý, aýdaryspaq, teńge alý tárizdi ulttyq oıyndardy tamashalady. Áńgimege tartqan ob­lystyq at sporty federa­sııa­sy­nyń prezıdenti O.Ámir­ǵa­lıev aldaǵy kezde mundaı irgeli isterdiń jalǵasatynyn jetkizdi. “О́z­derińiz tamashalaǵandaı, kókpardan “Aq bıdaı” oıyndarynyń jeńim­pa­zy, ob­lystyq “Úshqońyr” koman­da­sy temir tulpardyń kiltin aldy. Dala teatryna balanatyn báıgeniń ótýine aýa raıy da oń yqpal etti”, dedi. Osylaısha Kók­bastaýdaǵy dú­bir­li báıge máresine jetip, Astana mereıin asqaqtatty. Kúmisjan BAIJAN, Almaty oblysy.