foto: Aqorda
Memleket basshysynyń aıtýynsha, Qazaqstan men Reseıde eki eldiń Mádenıet kúnderi turaqty túrde uıymdastyrylyp, is-sharalar keńinen ótkizilip keledi.
«Qazaqstan men Reseıde eki eldiń Mádenıet kúnderi turaqty túrde uıymdastyrylyp, halyqtarymyzdyń baı rýhanı murasyn pash etetin is-sharalar keńinen ótkiziledi. Eki el tarıhshylary men saıasattanýshylarynyń pikirtalas alańdarynda bas qosýy da ıgi dástúrge aınaldy. Bıyl úshinshi Qazaqstan – Reseı medıaforýmy ótedi. Bul jıyn aqparattyq yqpaldastyqty qalyptastyrýǵa múmkindik beredi. Mundaı alańdar halyqtarymyzdyń arasyna syna qaǵatyn jalǵan aqparatqa qarsy is-qımyl boıynsha tájirıbe almasýǵa qajet. Bıyl shilde-tamyz aılarynda Astanada úshinshi «Bolashaq oıyndaryn» tabysty ótkizýge den qoıyp otyrmyz», dedi Qasym-Jomart Toqaev.
Sondaı-aq Qasym-Jomart Toqaev bilim salasyndaǵy jobalarǵa toqtaldy.
«Bilim salasyndaǵy birlesken jobalarǵa arnaıy toqtalǵym keledi. Qazaqstanda «Sırıýs» talanttary eki ret kezdesti. Iаǵnı jańa býyn mamandaryn daıarlaý úshin daryndy jastarǵa júıeli túrde qoldaý kórsetiledi. Bıyl qańtar aıynda Almatyda «Sırıýs» ortalyǵy boı kóteretin jerge alǵashqy kapsýlany salý rásimi ótti. Jańa ǵana biz Astanada dál osyndaı is-sharaǵa kýá boldyq. «Sırıýs» ortalyǵynyń bilim berý jobalary gýmanıtarlyq saladaǵy maqtan tutar bastamamyzǵa aınalyp, eki eldiń zııatkerlik qýatyn arttyrýǵa zor úles qosary anyq», dedi Prezıdent.
Qasym-Jomart Toqaev Reseı tarapymen kelissózderdiń qalaı ótkenin aıtyp berdi
