Foto: Salı Sabırov/UOK
London Olımpıadasynyń chempıony Serik Sápıevtiń aıtýynsha, olımpıadalyq sıkl aıaqtalǵannan keıin jańa daıyndyq kezeńi bastalady. Sondyqtan jańa kelisimshart qajet bolady. Bul qujat sportshynyń oqý-jattyǵý jıyndaryna qatysýyna, halyqaralyq jarystary men daıyndyq prosesine jumsalady.
«Olımpıadadan keıin biz memleket tarapynan qarastyrylǵan júldeli oryndarǵa arnalǵan marapattardy alamyz. Marapat tipti altynshy orynǵa deıin taǵaıyndalady. Olımpıadaǵa deıin men kelisimshartqa qol qoıdym, Olımpıadadan keıin de kelisimshartqa qol qoıdym», deıdi Serik Sápıev.
Al Parıj Olımpıadasynyń jeńimpazy Eldos Smetovtyń aıtýynsha, kelisimshartsyz jalaqy alý múmkin emes.
«Kelisimshart kez kelgen salada bar, tek sportta ǵana emes. Sol kelisimshartqa qol qoıylǵannan keıin ǵana jalaqy tólenedi. Múmkin, keıbir adamdarǵa sharttar nemese talaptar unamaýy múmkin, jalaqy az dep eseptep, qol qoıýdan bas tartatyn jaǵdaılar da bolýy yqtımal. Biraq jalpy, kontraktsyz jalaqy alý degen tájirıbe joq», dedi ol.
Mıhaıl Shaıdorov halyqaralyq syılyqqa úmitkerler tizimine endi
Sıdneı Olımpıadasynyń chempıony Ermahan Ybraıymovtyń sózinshe, memlekettik qoldaýǵa ıe bolý úshin sportshynyń sol salada eńbegi sińýi kerek.
«О́zderińiz bilesizder, Olımpıada chempıondary, júldegerleri jáne álem chempıondaryna ómir boıǵy zeınetaqy tólenedi. Bul – memleket bekitken 100 AEK kólemindegi tólem. Atalǵan tólem sportshynyń sportqa sińirgen eńbegine baılanysty beriledi. Ony alý úshin belgili bir talaptar da bar, mysaly sport salasynda belgili ýaqyt eńbek etý qajet», dedi Ermahan Ybraıymov.
Mıhaıl Shaıdorovtyń búginde Qazaqstan sportynyń kóshbasshylarynyń biri ekenin, elge halyqaralyq arenada úlken jeńister men tanymaldyq ákelgen sportshy ekenin atap ótken chempıondar zańdyq rásimderdiń tezirek aıaqtaý qajettigin atap ótti.
Eske sala keteıik, buǵan deıin Mılanda ótken qysqy Olımpıadanyń mánerlep syrǵanaýdan chempıony atanǵan otandasymyz Mıhaıl Shaıdorov birneshe aı boıy jalaqy almaǵanyn aıtqan edi.
