Aqtóbelik oqýshylar respýblıkalyq baıqaýda jeńiske jetti

  AQTО́BE. 28 aqpan. Aqtóbelik oqýshylar respýblıkalyq baıqaýdan oljaly oraldy. Bul týraly «Aqtóbe» gazeti habarlady. «Atadan mura» qoǵamdyq qory men «Ulan» gazetiniń uıytqy bolýymen ótken baıqaýdyń maqsaty – balalardy ádebıetke, óner men bilimge tárbıeleý. Ásirese, uıymdastyrýshylar jas jetkinshekterdiń kórkem shyǵarmalarǵa qushtarlyǵyn arttyrýǵa, mánerlep oqý mádenıetin qalyptastyrýǵa jáne dástúrli án men kúıdi dáripteýge erekshe kóńil bóldi. Baıqaý barysynda kórkemsóz, aspapta oınaý jáne dástúrli án nomınasııalary boıynsha ótken saıysta Aqtóbe qalasyndaǵy №24 lıngvıstıkalyq mektep-gımnazııanyń úsh birdeı oqýshysy jeńiske jetti. 10-synyp oqýshysy Janel Muratova kórkemsóz oqý nomınasııasy boıynsha dramalyq shyǵarmadan monolog oqý saıysynda bas júlde aldy. Al 8-synyp oqýshylary Álıhan Amanbaı men Álisher Birman poezııa janry boıynsha kórkemsóz oqýdan 1-oryn ıelendi. Jeńimpazdar laıyqty marapattaldy. Satybaldy Sáýirbaı. Derek: «Aqtóbe» gazeti. Sýret: kaz.tengrinews.kz.