Zertteý kásipkerler men mekemeler arasynda júrgizilgen saýalnama negizinde ázirlengen. Palata ókilderiniń aıtýynsha, saýalnama 2 aqpan men 20 naýryz aralyǵynda ótken. Oǵan óńirdegi 1471 kásiporyn men uıym qatysqan. Sonyń 827-si – jeke kásipker, 644-i – zańdy tulǵa.
Saýalnamaǵa negizinen shaǵyn bıznes sýbektileri qamtylǵan. Atap aıtqanda, 10 adamǵa deıin jumyskeri bar 917 uıym zerttelse, 10-nan 99 adamǵa deıin qyzmetkeri bar 443 kompanııa jáne
100-den 249 adamǵa deıin eńbek etetin 88 orta kásiporyn saýalnamaǵa qatystyrylǵan. Budan bólek, 250-den astam adamdy jumyspen qamtyp otyrǵan 23 iri kásiporynnyń da kadrlyq ahýaly saralanǵan.
Salalyq turǵydan alǵanda zertteý aýyl sharýashylyǵy, saýda, qyzmet kórsetý, bilim, kólik jáne óńdeý ónerkásibin qamtyǵan. Onyń ishinde 444 aýyl sharýashylyǵy kásiporny, 281 saýda nysany jáne 110 qyzmet kórsetý uıymy zerdelendi. Sonymen qatar bilim salasyndaǵy 102 mekeme, kólik salasyndaǵy 93 uıym jáne 79 óńdeý kásipornynyń kadrlyq qajettiligi qarastyrylǵan.
Saýalnama qorytyndysyn jarııalaǵan óńirlik kásipkerler palatasynyń dırektory Esjan Orazalınniń aıtýynsha, aldaǵy úsh jylda oblys boıynsha naqty 4894 maman jetispeıdi.
«Kadr tapshylyǵy ásirese Petropavl qalasynda aıqyn baıqalady. Jalpy qajettiliktiń 64 paıyzy nemese 3152 maman oblys ortalyǵyna tıesili. Aýdandar boıynsha Esil aýdanynda – 244, Aqqaıyńda – 229, Ǵabıt Músirepov atyndaǵy aýdanda – 183, al Tımırıazev aýdanynda 177 maman qajet», dedi ol.
Sondaı-aq ekonomıkalyq qyzmet túrleri boıynsha memlekettik basqarý salasynda da kadr jetispeýshiligi baıalǵan. Bul baǵytta 1114 maman qajet ekeni anyqtalǵan.
О́ndiris salalary arasynda aýyl sharýashylyǵynda 822 bos jumys orny tirkelse, saýda salasynda – 509, óńdeý sektorynda 416 vakansııa bar.
Zertteý nátıjesi óńirde eń kóp suranysqa ıe mamandyqtardy da aıqyndady. Qazirgi tańda kásiporyndar men mekemelerge 330 aspaz, 220 elektrmonter, 178 logoped, 163 avtoslesar jáne 132 traktorıst-mashınıst qajet.
Budan bólek, ınjener-mehanıkter, medbıkeler men deneshynyqtyrý pániniń muǵalimderine suranys joǵary. Ásirese kásibı-tehnıkalyq bilimi bar mamandar tapshy. Búginde mundaı kadrlarǵa arnalǵan 2862 bos jumys orny bar.
Kásipkerler palatasynyń málimetinshe, saýalnama qorytyndylary tıisti memlekettik organdarǵa joldanyp, oqý oryndarynyń bilim baǵdarlamalary men granttar sanyn naqty eńbek naryǵynyń suranysyna beıimdeý kezinde eskerilmek. Bul óńirdegi joǵary oqý oryndary men kolledjderdiń maman daıarlaý júıesin ekonomıkanyń naqty qajettiligine sáıkestendirýge múmkindik beredi degen úmit bar.
Soltústik Qazaqstan oblysy
