Jarys kúndeligi

Sıýrıh (Shveısarııa) qalasynda Halyqaralyq hokkeı federasııasynyń (IIHF) kongresi ótti. Jıynda kelesi álem chempıonaty 2027 jyldyń 14–30 mamyry aralyǵynda Germanııanyń Dıýs­seldorf, Mangeım qalalarynda uıym­das­tyrylatyn bolyp belgilendi. Jarysqa eli­mizdiń quramasy da qatysady. Al áıelder komandasy 2027 jylǵy 1–7 kúnderi Ońtústik Koreıanyń Sývon qala­synda jalaýy jelbireıtin IV dıvı­zıonyndaǵy álem chempıonatynda baq synaıdy.

Jastardyń «Rolan Garrosynda» Zańǵar Nurlanuly sátti óner kórse­tip jatyr. Alǵashqy aınalymda ulybrı­tanııalyq Mark Sebanǵa san soqtyrǵan qazaq tennısshisi kelesi kezdesýde amerıkalyq Agassı Rasherdi 6:2, 6:1 esebimen oısyrata utty.

Birikken kúres álemi (UWW) Rızabek Aıt­muhandy mamyr aıynyń eń úzdik erkin kúres sheberi dep tanydy. Bıyl asa aýyr salmaqta óner kórsetken qazaq balýany jas­tar arasyndaǵy Azııa birinshiliginde (U23) bas júlde oljalady. Bir aıta keterligi, Rızabek barlyq básekeni merziminen buryn aıaqtady. Grek-rım kúresi sheberleri arasynda ondaı ataq armenııalyq Djanes Nazarıanǵa buıyrsa, áıelder kúresinen amerıkalyq Kaılı Ýelker úzdik shyqty.

Anna Danılına men AQSh-tyń ókili Djeıms Treısı «Rolan Garrostyń» aralas juptar arasyndaǵy saıystyń shırek fınalynda ıtalııalyq Sara Erranı men Andrea Vavassorıden utyldy. Esep – 2:6, 2:6. Apennın túbeginiń tennısshileri byltyr dál osy týrnırde top jardy.

Erteń Ulan-Batyrda kúres túrleri­nen halyqaralyq týrnırdiń shymyldyǵy túriledi. Jarysty grek-rım kúresi sheberleri bastaıdy. Mońǵolııaǵa sapar shekken bes balýanymyzdyń arasynan asa aýyr salmaqtaǵy Álisher Erǵalı men Oljas Syrlybaıdy erekshe atap ótýge bolady. Áıelder kúresinen segiz sportshymyz bozkilemge shyǵady. Olardyń barlyǵy da kil myqtylar. Arasynda Olımpııa oıyndary men álem chempıonattarynda olja salǵan Elmıra Syzdyqova men Jámıla Baqbergenova bar. Erkin kúresten Azamat Dáýletbekov (92 kg) bastaǵan 18 apaıtós kúsh synasady.

Sporttyq statıstıkany serik etken «Flashscore» portaly «Qaırat» klýbynyń qaqpashysy Temir­lan Anarbekovti ÝEFA Chempıondar lıgasynyń shartty quramyna engizdi. Qan­dasymyzdan bólek, myqtylar tiziminde Alessandro Bastonı, Vırdjıl Van Deık, Rodıneı, Braım Dıas, Vıtınıa, Maıkl Olıse, Lamın Iаmal, Kılıan Mbappe, Garrı Keın, Hvıcha Kvarashelııa syndy ataqty fýtbolshylar bar.

6 maýsymda Anglııanyń Bornmýtyn­da asa aýyr salmaqtaǵy kásipqoı boks­shy Ivan Dychko (15-1, 14 KO) jarys qo­jaıyny Harvı Daıkspen (7-0-1, 0 KO) ju­dyryqtasady. Sońǵy jekpe-jegin byltyr qyrkúıek aıynda ótkizgen Qos­tanaıdyń alyby Las-Vegasta amerıkalyq Djermeın Franklınnen (24-3, 15 KO) jeńilgen edi.