Aıaqtalǵan oqý jyly Ertis-Baıan óńiri úshin asa nátıjeli boldy. Pavlodarlyq jas órender túrli deńgeıdegi bedeldi zııatkerlik jarystarda 307 medal jeńip alyp, jyl qorytyndysy boıynsha oblys quramasy «Úzdik olımpıadalyq komanda – 2026» atandy.
Oqýshylardy jetistikterimen quttyqtaǵan óńir basshysy jas talanttardyń tabystary búkil oblys úshin erekshe maqtanysh ekenin atap ótti.
– Búgin osy zalǵa jınalǵan talantty jastar – Otanyn shynaıy súıetin patrıot urpaqtyń úzdik ókilderi. Bıyl oblysymyz 307 medal jeńip alyp, elimizdiń kóshbasshy óńirleriniń qataryna endi. Halyqaralyq deńgeıdegi 56 marapat barshamyzǵa úlken maqtanysh. Bul pavlodarlyq oqýshylardyń joǵary zııatkerlik áleýetiniń aıqyn dáleli, – dedi Asaıyn Baıhanov.
Ol qazirgi álemniń tehnologııalardyń yqpalymen qarqyndy ózgerip jatqanyn atap ótip, búgingi oqýshylar erteńgi jańashyl ózgeristerdiń kóshbasshylary bolatynyn aıtty. Sonymen qatar adaldyq, jaýapkershilik, ádildik sekildi qundylyqtardyń mańyzdylyǵyna toqtaldy. Ustazdar men ata-analarǵa da alǵys sózder aıtyldy. Árbir joǵary jetistiktiń artynda uzaq jylǵy eńbek, otbasynyń qoldaýy men ustazdardyń kásibıligi turǵanyn erekshe atap ótti.
О́ńir basshysy halyqaralyq jáne respýblıkalyq zııatkerlik jarystardyń jeńimpazdary men júldegerlerine Alǵyshattar men aqshalaı sertıfıkattar tabystady. Al oqýshylar oblys basshylyǵyna kórsetken jan-jaqty qoldaýy men qamqorlyǵy úshin alǵystaryn bildirdi.
– О́ńirimizde maqtan tutýǵa turarlyq talantty ári daryndy jastar óte kóp. Jas daryndarǵa qoldaý kórsetý bizdi odan ári damýǵa, jańa bilim alýǵa yntalandyrady, – dedi Pavlodar qalasyndaǵy er balalarǵa arnalǵan «Bilim-Innovasııa» lıseı-ınternatynyń oqýshysy, ashyq halyqaralyq olımpıadanyń jáne bıologııa páni boıynsha respýblıkalyq olımpıadanyń altyn medal ıegeri Ersultan Qaıyrken.
«Búgin osy jerde bolý – árqaısymyz úshin úlken mártebe ári zor maqtanysh. Olımpıadalardaǵy jeńisterimizdiń artynda oblys basshylyǵy tarapynan kórsetiletin úlken qoldaý tur. Jastardyń áleýetine senip, ár talanttyń ashylýyna jaǵdaı jasap otyrǵandaryńyz úshin alǵysymyzdy bildiremiz», dedi Pavlodar qalasyndaǵy №8 mektep-lıseıiniń oqýshysy Iýlııa Katýnına. Ol qyzdar arasyndaǵy Eýropalyq olımpıadanyń jáne respýblıkalyq olımpıadanyń kúmis júldegeri, sondaı-aq Azııa-Tynyq muhıty halyqaralyq olımpıadasy men «Jibek joly» halyqaralyq olımpıadasynyń qola júldegeri.
Pavlodar oblysy
