Foto: Ashyq derekkóz
Tórt aptanyń qorytyndysy boıynsha talapkerlerdiń 67%-y shekti ball jınady. Bes pán boıynsha ortasha kórsetkish – 64 baldy qurady. Eń joǵary nátıje – 140 ball. Bul kórsetkishke Pavlodar oblysynyń túlegi Áset Altaır ıe boldy.
Ulttyq testileý ortalyǵy erekshe bilim berý qajettilikteri bar talapkerlerge qolaıly jaǵdaı jasaýǵa basymdyq berip keledi. Bıylǵy testileýge osyndaı sanattaǵy 556 talapker qatysty.
Testileý aıaqtalǵannan keıin talapkerlerge tapsyrmalardyń mazmunyna qatysty 30 mınýt ishinde apellıasııa berý múmkindigi qarastyrylǵan. Al tehnıkalyq aqaýlarǵa baılanysty shaǵymdar testileý barysynda qabyldanady. Sertıfıkattar apellıasııalyq ótinishter tolyq qaralǵan soń talapkerlerdiń jeke kabınetterine jiberiledi.
Tórt apta ishinde UBT erejelerin buzýdyń 391 deregi tirkeldi. Onyń ishinde 246 talapker smartfon, smart kózildirik, mıkroqulaqqap, shpargalka sekildi tyıym salynǵan zattardy alyp kirmek bolǵany úshin testileýden shettetildi. Taǵy 145 adam testileý kezinde tártip buzǵany úshin aýdıtorııadan shyǵarylyp, olardyń nátıjeleri joıyldy. Bıyl ózge adamnyń ornyna test tapsyrý faktileri anyqtalǵan joq.
UBT kezinde jaryq óship qalsa, túlekterdiń nátıjesi qalaı baǵalanady? Mınıstr jaýap berdi
UBT aıaqtalǵannan keıin bıylǵy jyldyń 31 qazanyna deıin beınejazbalarǵa qosymsha taldaý júrgiziledi. Eger beınebaqylaý barysynda tyıym salynǵan zattardy paıdalaný nemese basqa da ereje buzýshylyqtar anyqtalsa, talapkerlerdiń nátıjeleri kúshin joıady.
Bıyl negizgi UBT-ǵa qatysý úshin eki múmkindik eskerilip, shamamen 240 myń talapkerden 446 myńnan astam ótinish qabyldanǵan.
Eske sala keteıik, 10 mamyrda Qazaqstanda negizgi Ulttyq biryńǵaı testileý (UBT) bastaldy. Bıylǵy synaq 10 shildege deıin jalǵasady.
Janbota BAHYTBEK,
EUÝ stýdenti
