Bekmahanov atyndaǵy shákirtaqy tapsyryldy

Ál-Farabı atyndaǵy Qazaq ulttyq ýnıversıtetinde uly ǵalymnyń ómiri men qyzmetine, týǵanyna 100 jyldyǵyna oraı Qazaq handyǵy qurylýynyń 550 jyldyǵyna arnalǵan «О́negeli ómir» serııasy boıynsha jaryq kórgen «Ermahan Bekmahanov» kitabynyń tusaýkeseri bolyp ótti. Bul shara ǵylymı ortaǵa jaqsy tanys «Bekmahanov oqýlary» aıasynda ótkizildi. Tanystyrýda QazUÝ rektory, akademık Ǵ.Mutanov, Parlament Májilisiniń depýtaty N.Jazylbekov, ǵalymnyń jary H.Bekmuhamedova, Sh.Ýálıhanov atyndaǵy tarıh jáne etnologııa ınstıtýtynyń dırektory, professor H.Ábjanov, jazýshy M.Sárseke sóz sóıledi. Sonymen qatar, ýnıversıtet oqytýshylary men stýdentteri de belsene qatysty. Ǵalym Mutanov: «Ermahan Bekmahanov qazaqstandyq tarıhnamada kórnekti oryn alady. Ol – qazaqtan shyqqan tuńǵysh tarıh ǵylymdarynyń doktory, respýblıkadaǵy alǵash ret Qazaqstan tarıhy kafedrasynyń negizin qalaýshy. Erekshe talanty, sarqylmas qajyr-qaıraty ári týǵan halqynyń tarıhyna orasan zor súıispenshiliginiń arqasynda óziniń az ǵana ǵumyrynda tarıh ǵylymyna baǵa jetpes úles qosty», – dep atap kórsetti. Basylymǵa ár jyldardaǵy E.Bek­mahanovtyń ómirbaıandyq málimetteri, maqalalary, fotosýretteri, sonymen qatar, ǵulama ǵalym týraly   tarıhshylardyń jáne de shákirtteriniń estelikteri men pikirleri engizilgen. Kitap kópshilik oqyrman qaýymǵa ári ǵylym-bilim berý ortalyqtarynda jumys atqaratyn qyzmetkerler men stýdentterge arnalǵan. Medeý Sárseke oqýǵa qatysýshylarǵa  óziniń Bekmahanov týraly – qazaq tilinde «Noqtalanǵan tarıhshy» jáne orys tilinde «Neobýzdannyı ıstorık» kitaptaryn usyn­dy. Olarda óziniń batyl kózqarastary jáne tarıhı shyndyqty kórsetkeni úshin qýǵyndalyp, sottalǵan ǵalymnyń aýyr taǵdyry baıan­dalady. Ol sonymen birge, tarıhshy-ǵa­lymnyń 100 jyldyǵyn, Qazaq handyǵy qurylýynyń 550 jyldyǵyn merekeleýmen sáıkes kelip otyrǵandyǵynyń sımvoldyǵy men mańyzdylyǵyn atap kórsetti. E.Bekmahanovtyń zaıyby Halıma Adamqyzy ǵalymdy eske ala otyryp, onyń jeke ómiri týraly tyń málimetter keltirdi. «Men Ermahanmen  jıyrma jyl ómir súrdim, odan kóp nárselerdi úırendim.  Ol únemi maǵan aqylshy jáne demeýshi boldy.  Abylaı hannyń urpaǵy retinde ol óz  Otanynyń naǵyz patrıoty boldy. Meniń oıymsha, onyń ómiri men qyzmeti tek uldaryna ǵana emes, búkil qazaq jastaryna úlgi», – dedi. Is-shara barysynda Parlament Máji­lisiniń depýtaty N.Jazylbekov «Aq jol» partııasynyń atynan tarıh, arheologııa jáne etnologııa fakýltetiniń úzdik stýdentterine E.Bekmahanov atyndaǵy shákirtaqyny tapsyrdy. Qorǵanbek AMANJOL, «Egemen Qazaqstan». ALMATY.