Jalǵyz ózi olja salǵan

Munyń aldynda halyq­aralyq dárejedegi sport she­beri Irına Ektovanyń úsh qarǵyp sekirýden 2016 jyly Rıo-de-Janeıro qalasynda ótetin Olımpıada oıyndaryna joldama jeńip alǵany, ile-shala Darıǵa Shákimovanyń bokstan Azııa chempıony atanǵany soltústikqazaqstandyqtardy qýantsa, Amanǵalı Bekbo­latovtyń tabysy mereılerin tipti asyrdy. Sóz arasynda komandalastar arasynda Darıǵanyń jalǵyz altyn syılaǵanyn, al Amanǵalıdyń el quramasyna júlde tartý etken dara sańlaq ekenin eskersek, úshinshi orynǵa taban tireýin ǵajaıyp jeńiske balaǵan bolar edik. Sol sebepti Brazılııada uıymdastyrylǵan jastar arasyndaǵy grek-rım kúresinen álem birinshiliginiń júldesin qanjyǵaǵa óńgerip ákelgen ony qarsy alý úshin oblys ákiminiń birinshi orynbasary Aıdarbek Saparov temirjol vokzalyna arnaıy baryp, jas balýannyń qolyn qysty. Aımaq basshysy Erik Sultanovtyń júrekjardy quttyqtaýyn jetkizdi. Týǵan-týystary men sportsúıer qaýym gúl shoqtaryn usynyp, úlken qoshemet kórsetti. Amanǵalı – grek-rım kúresinen Qazaqstannyń úsh dúrkin chempıony. Búginde M.Qozybaev atyndaǵy Soltústik Qazaqstan memlekettik ýnıversıtetinde oqıdy. – Álem birinshiligine baratyn sportshylarǵa bólingen qarajattyń shekteýliginen Amanǵalıdyń dodaly básekege qatysý-qatyspaýy ekitalaı edi. Oblys ákiminiń tikeleı qoldaýy arqasynda qajetti qarjy tabylyp, endi, mine, myńdaǵan jankúıerlerdiń senimin aqtaı bildi. 58 elden kelgen 200 sportshy arasynan mańdaıy jarqyrap, el quramasyna jalǵyz júlde áperýin qalaı áspettesek te jarasady, – deıdi oblystyq deneshynyqtyrý jáne sport basqarmasynyń basshysy Rýslan Esenalın. Ol osydan úsh jyl buryn Bolgarııada olja salǵan jerlesi Aqan Baımaǵanbetovtiń jetken jetistigin, alǵan asýyn baǵyndyrdy. О́mir ESQALI, «Egemen Qazaqstan». Soltústik Qazaqstan oblysy.