Kıpr komandasyn jeńdi

Burnaǵy kúni Chempıondar lıgasy irikteý týrnıriniń pleı-off básekesi sheńberinde «Astana» óz alańynda Kıprdiń APOEL komandasyn qabyldady. «Astana-Arena» sport kesheninde ótken kezdesý nátıjesinde elordalyqtar 1:0 esebimen jeńiske jetti. Osy rette stadıonǵa 30 myń jankúıer jınalyp, rekordtyq kórsetkish tirkelgenin atap ótken jón. Oıyndy alań ıeleri óte belsendi bastady. Tipti 4-mınýtta olar qaýipti shabýyl uıym­dastyryp, esep ashatyn tamasha múmkindikke ıe boldy. Alaıda, Baýyrjan Jolshıevtiń jasaǵan soqqysyna qarsylastardyń qaqpashysy Boı Vaterman tosqaýyl qoıa bildi. Degenmen, bizdiń komanda jyldam gol soǵýdyń oraıyn keltire aldy. Matchtyń 14-mınýtynda Foksı Ketevoamanyń qap­taldan asyrǵan pasyna ózgelerden buryn jetken Baýyrjan dopty basymen qaq­paǵa engizip, óte ádemi goldyń avtory atandy. Bul esep úziliske deıin ózgergen joq. Ekinshi taım qonaqtardyń basymdyǵymen ótti. Negizinen qorǵanysqa mán berip, qarymta shabýyldarǵa ǵana ıek artqan «Astana» qarsylastaryna erkin oınaýǵa múmkindik berip qoıdy. Abyroı bolǵanda, Kıprden kelgen oıynshylar bizdiń qaqpadan sańylaý taba alǵan joq. Endi komandalar 26 tamyzda Nıkosııada qarymta kezdesý ótkizedi. Chempıondar lıgasynyń toptyq saıysyna joldama alý úshin «Astanaǵa» ol oıynda teń oınasa da jetip jatyr. Aıta keteıik, osy jeńisten keıin Qazaqstan ÝEFA-nyń qurama komandalar arasyndaǵy reıtınginde 31-satyǵa turaqtady. Búginde bizdiń qorjynda 11,750 upaı bar. Eýrokýboktyq báse­kelerde «Astanadan» bólek, Alma­tynyń «Qaıraty» da sátti oınap jat­qanyn eskersek, bul kórsetkishti áli de jaqsartýǵa múmkindik bar. Elaman QOŃYR, «Egemen Qazaqstan».