Elbasy Erkin ekonomıkalyq qoǵamdastyqtyń medalimen marapattaldy

ASTANA. 30 maýsym. Memleket basshysy Erkin ekonomıkalyq qoǵamdastyqtyń Úlken altyn medalimen marapattaldy. Bul týraly «QazAqparat» habarlady. Máskeýde Reseıdegi Qazaqstan elshiliginde Qazaqstan Respýblıkasynyń Prezıdenti Nursultan Nazarbaevty «álemdik ekonomıkanyń damýyna, tarıhı mańyzdy bastamalary men ıntegrasııalyq úrdisterdiń qurylýy jáne ony jetildirý salalaryndaǵy joǵary jetistikteri, Eýrazııalyq ekonomıkalyq odaqtyń damýy, Reseı Federasııasy men Qazaqstan Respýblıkasy arasyndaǵy ekonomıkalyq, ǵylymı, mádenı baılanysty nyǵaıtýǵa qosqan úlesi jáne belsendi qoǵamdyq qyzmeti úshin» Erkin ekonomıkalyq qoǵamdastyqtyń (EEQ) Úlken altyn medalimen marapattaý rásimi ótti. Sharaǵa elshiliktiń qyzmetkerleri men BAQ ókilderi qatysty. Marapatty usynǵan Erkin ekonomıkalyq qoǵamdastyqtyń basshysy, Reseıdiń belgili ekonomısi, Máskeýdiń birinshi meri (1991-1992) Gavrııl Popov Nursultan Nazarbaevtyń Reseı EEQ Úlken altyn medaline ıe bolǵan alǵashqy sheteldik azamat ekenin atap ótti. О́z kezeginde medaldi qabyldaǵan Reseıdegi Qazaqstannyń tótenshe jáne ókiletti elshisi Marat Tájın G.Popovqa Elbasynyń ekonomıka ǵylymyndaǵy qyzmetine joǵary baǵa bergeni úshin alǵys aıtty. M.Tájın atap ótkendeı, bul marapat jaı qurmet kórsetý ǵana emes, Nursultan Nazarbaevtyń eýrazııalyq dıalogtyń nyǵaıýyna, Reseımen tatý kórshiles qatynastardyń damýyna qosqan asa zor ǵylymı jáne tájirıbelik úlesin moıyndaý. Elaman Qońyr. Derek, sýret: «QazAqparat».