Álem chempıonatynyń ashylý saltanatyna qatysty

Qazaqstan Respýblıkasynyń Memlekettik hatshysy Gúlshara Ábdiqalyqova velosıped sportynan – velotrekten jasóspirimder arasyndaǵy UCI álem chempıonatynyń ashylý saltanatyna qatysty, dep habarlady Prezıdenttiń baspasóz qyzmeti. Kirispe sózinde Gúlshara Ábdi­qalyqova Memleket basshy­synyń jan-jaqty qoldaýy arqasynda búgingi tańda elimizde halyqaralyq talaptarǵa saı sporttyq nysandar boı kóterip, álemdik deńgeıdegi sporttyq sharalar oıdaǵydaı ótkizilip jatqanyn atap ótti. Velosıped sporty elimizde keń taralǵan sport túrine jatady, 10 myńnan asa qazaqstan­dyq velosportpen júıeli shu­ǵyldanady. «Astana» kásibı veloklýby – Qazaqstannyń álemdegi eń tanymal sporttyq brendteriniń biri. Álem chempıonaty Azııa qurlyǵynyń úzdik jasóspirim sportshylaryn, sonymen qatar, velosıped sporty mamandary men jankúıerlerin, álemdik sport qaýymdastyǵynyń ókil­derin jınap otyr. Mundaı deńgeıdegi sharany ótkizý el abyroıyn arttyryp, A.Vınokýrov, A.Bazaev, Z.Zabırova jáne basqa da álemdik deńgeıdegi qazaqstandyq sańlaqtardy úlgi tutqan jastar arasynda velosportty nasıhattaýdyń pármendi quralyna aınalmaq. Álemdik birinshilikke dúnıe júziniń 31 elinen 200 sportshy qatysyp, jalpy sany 19 medal sarapqa salynatyn bolady. Elimiz 2011 jyly velotrekten Álem kýbogyn, 2014 jyly tas joldaǵy velosport jáne velotrekten Azııa chempıonatyn tabysty ótkizdi. Jarystardyń joǵary deńgeıde uıymdastyrylýy, álemdik standartqa saı qolaıly jaǵdaı, sondaı-aq sarapshylardyń oń pikiri UCI halyqaralyq velosıpedshiler odaǵynyń 2015 jylǵy jasóspirimder arasyndaǵy álem chempıonatyn Astana qalasynda ótkizý jóninde sheshim qabyldaýyna yqpal etti.