Astanaǵa arzan et kele jatyr

Keshe kóne Tarazdan arman qala Astanaǵa qaraı kerýen shyqty. Naqtyraq aıtsaq, Jambyl oblysynyń aýyl sharýashylyǵy ónimderi tıelgen júk kólikter kerýeni. Bul joly jambyldyq dıqandar Astana qalasyna 24,5 mln. teńgeni quraıtyn 115 tonna aýyl­sharýashylyq ónimderin áketti. – Astana qalasynyń aınalasynda azyq-túlik beldeýin qurý jónindegi Elbasynyń tapsyrmasyn oryndaý maqsatynda «Qazaq handyǵynyń 550 jyldyǵyna» oraı Jambyl oblysy ákimdigi men aýyl sharýashylyǵy basqarmasy jáne «Taraz» ÁKK» AQ-tyń uıymdastyrýymen tamyz aıynyń 22-si men qyrkúıek aıynyń 22-si aralyǵynda Astana qalasynda apta saıyn aýyl sharýashylyǵy jármeńkesin ótkizý josparlanǵan, – deıdi bul jóninde Jambyl oblysy ákiminiń orynbasary Abdaly Nuralıev. – Osyǵan oraı Astana qalasyna 10 tonna et ónimderi, 2 tonna sút, 5 tonna shujyq, 57 tonnadan astam kókónis-baqsha ónimderi jóneltildi. Odan bólek, oblysta óndiriletin basqa da aýyl sharýashylyǵy taýarlary, atap aıtsaq, ara baly, qymyz, makaron ónimderi, ósimdik maıy bar. 6 refrıjerator kóligine tıelgen taýarlardy 30 satýshy aldaǵy demalys kúnderi Astana qalasynyń turǵyndaryna 15-20 paıyz tómen baǵamen usynatyn bolady. Mine, jambyldyq dıqandar osyndaı jomarttyq tanytyp otyr. Teginde tonnalap jınaǵan ónimderdi tıimdi, shyǵynsyz satý da úlken eńbek. Bul jaǵynan kelgende bul saýda eki jaqqa da tıimdi bolyp turǵany taǵy anyq. Oralhan DÁÝIT, «Egemen Qazaqstan». Jambyl oblysy. Sýretterdi túsirgen Aqádil RYSMAHAN.