Samat Smaqov: Merkel ulttyq quramanyń oıynyna tyń serpin beredi

ASTANA. 4 naýryz. Jaqynda ǵana Qazaqstan Fýtbol federasııasy nemis fýtbolshysy Aleksandr Merkeldiń ulttyq quramaǵa qosylǵanyn málimdedi. Osy týraly elimizdegi eń tanymal fýtbolshylardyń biri, ulttyq quramanyń kapıtany Samat Smaqov óz oıymen bólisti. Bul týraly kff.kz habarlady. – Menińshe, Italııanyń «A» serııasynda kez kelgen adam oınamaıdy. Onyń ústine, «Mılannyń» negizgi quramyna iligý naǵyz sheberlikti talap etedi. Al Aleksandr osynyń bárinen ótken fýtbolshy. Sondyqtan ol bizdiń ulttyq quramanyń oıynyna tyń serpin bereri sózsiz, – deıdi tájirıbeli fýtbolshy. Sonymen qatar, Samat Smaqov nemis fýtbolshysy týarly biletin derekterimen bólisti. «Jalpy, Aleksandrmen jeke tanys emespin. Sol sebepti, ol týraly jankúıerler men bizdiń basqa fýtbolshylarǵa belgili derekterdi ǵana bilemin. Iаǵnı, onyń Almatyda dúnıege kelgenin, keıin ata-anasymen Germanııaǵa kóship ketkeni jaıly habardarmyn. Sondaı-aq, «Shtýtgarttyń» jastar komandasynda sheberligimen kózge túsip, sonyń nátıjesinde, «Mılanǵa» aýysqan. Qazir ol Italııanyń «Ýdıneze» komandasyna tıesili fýtbolshy. Áıtse de, Shveısarııanyń «Grasshopper» komandasyna jalǵa berilgen eken. Fýtbolshynyń oıynyn áli kórip úlgermedim», – degen Samat mamandardyń Merkeldiń oıynyna oń baǵa berip jatqany kóńil qýantatynyn aıtty. «Sondaı-aq, Aleksandr Germanııa quramasynyń jasóspirimder men jastar komandalarynda oınaǵan fýtbolshy. Bul mol tájirıbe. Sol tájirıbeniń Qazaqstan ulttyq quramasyndaǵy oıynyna paıdasy tıerine senimdimin. Germanııa óz ulttyq quramasy úshin fýtbolshy daıyndaýda álemde aldyńǵy qatarda. Tipti bul másele ol jaqta belgili bir júıege qoıylyp, jemisti jumys isteýde. Ony bilý úshin bilikti fýtbol mamany bolýdyń da qajeti shamaly. Tipti búginde býndestım týraly, nemis fýtbolynyń qarqyny jaıynda bireýge túsindirip jatýdyń ózi artyq. Ol úshin FIFA-nyń qazirgi reıtıngine nazar aýdarsa jetkilikti. Al ol jerde Germanııa kósh bastap tur. Sondyqtan Aleksandrdyń Germanııa quramasynyń jastar komandasynda oınaýy onyń bilikti fýtbolshy retinde ósýine múmkindik berdi. Sondaı-aq, «Mılan» sapynda júrip joǵary deńgeıli fýtbolshylarmen bir komandada oınaýdyń ózi Merkelge ómirlik tájirıbe bolǵany anyq. Odan bólek, Aleksandr orys tilinde erkin sóıleıdi. Komandaǵa sińisip, tez til tabysyp ketý úshin tildiń kómegi zor. Eń mańyzdysy, quramadaǵy ózge áriptesterimen jáne bas jattyqtyrýshy Iýrıı Anatolevıchpen ońaı til tabysatyn bolady», – dep ulttyq quramany kapıtany sý jańa áriptesine sáttilik tiledi. Elaman Qońyr. Derek, sýret: kff.kz.