Kıikter qyrylyp jatyr

  Alǵashqy kúni qystyń aýyrlyǵynan kóterem bolǵan kıikter ólip jatyr degen boljam aıtylǵan bolatyn. 13 mamyrdyń kúni dala arýynyń jappaı qyrylýy bastaldy. Sol kúni mamandar ólgen kıikterdiń 1000-ǵa jetip jyǵylǵanyn habarlady. Keshe oblystyq orman sharýashylyǵy jáne janýarlar dúnıesi aýmaqtyq ınspeksııasynyń basshysy Marat Begimbetov ajal qushqan kıiktiń sany 1018-ge jetkenin aıtty. – Aqbókenniń 941 eshkisi, 22 tekesi jáne bıyl órgen 55 quralaıy ólgen. Olardyń barlyǵy der ýaqytynda joıylyp, zalasyzdandyryldy, – dedi Marat Ábdirahmanuly. – Mamandar sol mańdaǵy topyraqtyń, sýdyń, aqbóken ólekseleriniń synamasyn alyp, respýblıkalyq laboratorııaǵa jedel jiberdi. Ol keminde onshaqty kún zerttelgennen keıin ǵana qorytyndy shyǵarylady. Onda qaýipti juqpaly aýrýlardyń bar-joǵy anyqtalady. Kıikterdiń jappaı qyrylýy 2012 jyly Jangeldın aýdanynda da oryn alǵan bolatyn. Onda 926 aqbókenniń ajalyna pasterellez juqpaly aýrýy sebep bolǵan edi. Dala erkesi ońtústik oblystar tóńireginde qystaıdy da, Torǵaı óńirine kelip tóldeıdi. Mamandardyń aıtýynsha, qýańshylyq bolǵan jazdan keıingi uzaq, aýyr qystan kóterem shyqqan aqbókender, ásirese, eshkileri juqpaly aýrýlarǵa tótep bere almaıdy. Qazir naq tóldep jatqan kezde qyrylyp jatyr. – Kıikterdiń 11 mamyrdan bastalǵan jappaı qyrylý oqıǵasy áli bir aptadaı sozylýy múmkin. О́ıtkeni, 2012 jyly Jangeldın aýdanynda olardyń ólekseleri 8 kún boıy jınalyp, joıylyp otyrǵan edi, – dedi Marat Ábdirahmanuly. Búginde «Altyn dala» memlekettik tabıǵı rezervaty men «Ohotzooprom» óndiristik birlestigi mamandary Amangeldi aýdanynda kıik úıirlerin baqylaýǵa alǵan. Zalalsyzdandyrý jumystary úshin ekskavator, júk mashınalary, dezınfeksııalyq dári-dármekterdiń barlyǵy qamtamasyz etilgen. О́tken jylǵy sanaq boıynsha «Altyn dala» tabıǵı memlekettik rezervatyna jatatyn Amangeldi aýdany tóńireginde 80 myńnan asa kıik bolǵan. Mindet olardy aman saqtap qalý bolyp otyr. Názıra JÁRIMBETOVA, «Egemen Qazaqstan». Qostanaı oblysy, Amangeldi aýdany.