Sheshenstanda polısııa bastyǵy ózinen 40 jas kishi qyzǵa úılenedi

ASTANA. 16 mamyr. Búgin Sheshenstan respýblıkasy Nojaı-Iýrt aýdandyq ishki ister bóliminiń 57 jastaǵy bastyǵy Najýd Gýgıchev Baıtarkı selosynyń 17 jasar turǵyny Lýıza Goılabıevamen úılený toıyn ótkizgeli jatyr. Bul týraly Lenta.ru habarlady. Sheshenstan lıderi Ramzan Kadyrov óziniń Instagram jelisi arqyly jurtty osy toıǵa shaqyrdy. Onyń jazýynsha, buǵan deıin ǵasyrdyń eń este qalarlyq neke tirkeý rásimi Brıtanııa hanzadasy Ýılıams pen Mıddltonnyń arasynda ótti dep eseptep kelgen. Alaıda, sońǵy kúnderdiń oqıǵasy myńjyldyqtyń basty saltanaty Gýgıchev pen Goılabıevanyń toıy bolǵaly turǵanyna kózin jetkize túsken. Resmı málimetter boıynsha, bul toıǵa mán berip jatqan BAQ-tar sany qazir 1,5 myńnan asqan. Ol shyn máninde ǵasyr toıy bolǵaly turǵan sııaqty. «Bizge toıǵa baılanysty Avstralııa men Monakodan da habarlasyp jatyr», degendi qosty Kadyrov. «Sonymen, 16 mamyr kúni saǵat 16:45-te Groznyıdyń AHAJ-ynda Najýd pen Lýızanyń resmı túrde nekege tirkelý sáti bolady. Toıǵa bárińizdi shaqyramyn», - dep jazdy Sheshenstan prezıdenti. Kadyrov bul toıdyń qatań túrde ıslam sharıaty men Reseı Federasııasynyń zańyna sáıkes ótkizilýin qatty qadaǵalaıtyndaryn málimdedi. «Bizdiń dástúrimizde, árıne, toıǵa deıin AHAJ-ǵa barý joq», - dedi ol. «Men sheshen bıleriniń úlken áýesqoıymyn. Toıda eń sulý qyzben bıleýdi armandap júrmin», - dedi Ramzan Kadyrov. Sheshenstan prezıdenti kezinde Gýgıchev pen Goılabıevanyń jeke ómirlerine arsyzdyqpen aralasqandardyń sot aldynda jaýap beretinin aıtty. Qazir osyǵan baılanysty tıisti talap-aryz daıyndalyp jatyr. Mamyr aıynyń basynda «Novaıa gazetada» 17 jasar Goılabıevany 57-degi Gýgıchevtiń álimjettikpen áıel etip alǵaly jatqany týraly habar shyqty. Onda aýdandyq ishki ister bólimi bastyǵynyń jas qyzdy ekinshi áıel etip alǵaly jatqany, qalyńdyǵyn bireýler respýblıka aýmaǵynan tysqary alyp ketpeý úshin barlyq jerde beket qoıǵany sóz bolady. Keıirinek buqaralyq aqparat quraldarynda Goılabıevanyń ózi men onyń týystarynyń bul toıǵa qarsy emes ekenderin bildirgen málimdesi jarııalandy. Osydan keıin «Novaıa gazetanyń» bul máseleni kóterip kelgen tilshisi Elena Mılashına óz ómirine qaýip tónýinen saqtanyp, Sheshenstannan ketýge májbúr boldy.