Boston oqıǵasyna qatysy bar otandastarymyzdyń soty maýsymda ótedi

ASTANA. 16 mamyr. Syrtqy ister mınıstrligi Boston lańkestigine qatysy bar dep aıyptalǵan Qazaqstan azamattary – Dıas Qadyrbaev pen Azamat Tajaıaqov jóninde resmı aqparat taratty. Bul týraly tengrinews.kz habarlady. Atalǵan mınıstrliktiń habarlaýynsha, otandastarymyzǵa qatysty sot otyrysy 2 jáne 5 maýsymda ótedi. Aıta keteıik, lańkestikti uıymdastyrdy dep aıyptalǵan Djohar Sarnaev ólim jazasyna kesildi. Vedomstvo taratqan habarlamada: «Syrtqy ister mınıstrligi Boston alqabıler sotynyń Djohar Sarnaevqa qatysty úkiminen habardar. Jaǵdaıdyń ári qaraı qalaı órbıtini basty nazarda bolmaq. Elimizdiń Nıý-Iorktaǵy bas konsýldyǵy aıyptalýshy Qazaqstan azamattarynyń ata-analary jáne advokattarymen únemi baılanysyp otyr. Sondaı-aq, barlyq qajetti quqyqtyq kómekti kórsetýde», – delingen. Esterińizge sala keteıik, aǵaıyndy Tamerlan jáne Djohar Sarnaevtar 2013 jyldyń sáýir aıynda dástúrli Boston marafony kezinde jarylys uıymdastyrdy. Nátıjesinde 3 adam qaza taýyp, 264-i ártúrli deńgeıdegi jaraqat aldy. Ustaý operasııasy kezinde Tamerlan Sarnaev qaza taýyp, Djohar qolǵa tústi. Osy jyldyń sáýir aıynda alqabıler soty uzaq keńesten keıin Djohar Sarnaevty oǵan taǵylǵan aıyptardyń 30 pýnkti boıynsha aıypty dep tapty. Nátıjesinde ony ólim jazasyna kesý týraly úkim shyqty. Al Qadyrbaev pen Tajaıaqovqa aıǵaq zattardy joıdy degen aıyp taǵylýda. Elaman Qońyr. Derek: tengrinews.kz. Sýret: reuters.com.