Hokkeı. Álem chempıonaty. Kanada – fınalda!

ASTANA. 16 mamyr. Búgin hokkeıden Chehııada jalaýyn jelbiretken álem chempıonatynyń jartylaı fınaldyq básekeleri ótedi. Ázirge bir oıynnyń nátıjesi belgili. Atalǵan synda Chehııany 2:0 esebimen jeńgen Kanada óz tarıhynda 38-ret fınalǵa joldama aldy. Toptyq kezeńde qos komanda arasyndaǵy oıyn Kanadanyń paıdasyna 6:3 esebimen aıaqtalǵanyn aıta keteıik. Bul týraly egemen.kz habarlady. Kanada – Chehııa 2:0 (1:0, 1:0, 0:0) Oıyn asa tartysty ótti. Kezdesýdiń 9-mınýtynda Kanada hokkeıshileri esep ashty. Ekinshi kezeńde soltústikamerıkalyqtar esepti eseledi (30-mınýt). Matchtyń bul bóliginde qos komanda da eki márte kishi aıyppen jazalanǵan edi. Alaıda, komandalar ózderine berilgen múmkindikti paıdalana almady. Al úshinshi kezeń teń jaǵdaıda órbidi. Nátıjesinde oıyn sońyna deıin esep ózgergen joq. Jalpy, kezdesýde kanadalyqtar 41 soqqy jasasa, Chehııa oıynshylary 23 márte qarsylastarynyń qaqpasyn nysanaǵa alǵan. Kanada hokkeıden álemdegi eń azýly quramalardyń biri ekeni belgili. Osyǵan deıin álem chempıonatyn 24 márte jeńip alǵan komanda ózderiniń 25-shi «altynyna» senimdi qadam basyp keledi. Degenmen, olar 2009 jyldan beri «altyn» turmaq, júldege de ilige almaı júr. Sol jyly álemdik dodanyń kúmis júldesine qol jetkizgen Soltústik Amerıka ókilderi ótken jyly 5-oryn alǵan bolatyn. Toptyq kezeńnen beri jeńilmeı kele jatqan Kanada fınalda AQSh pen Reseı arasyndaǵy matchtyń jeńimpazymen kúsh synasady. Atalǵan oıyn Astana ýaqyty boıynsha saǵat 23:15-te bastalady. Elaman Qońyr. Derek: egemen.kz. Sýret: eurosport.ru.