Ashyq aspan astyndaǵy opera

Astana kúni merekesine oraı, 1 shildede Mádenıet jáne sport mınıstrligi uıymdastyrýymen Beıbitshilik jáne kelisim saraıy aldyndaǵy ashyq alańda Dj. Verdıdiń «Aıda» operasy qoıylmaq. Ortalyq kommýnıkasııalar qyzmetinde ótken baspasóz máslıhatynda uıymdastyrýshylar men belgili óner sheberleri ǵajaıyp dekorasııalar men otshashýmen bezendirilgen shoý sıpatyndaǵy sahnalyq joba týraly oılarymen bólisti. Olar qonaqtar úshin bıylǵy qala kúnindegi erekshe syıdyń biri osy bolatynyna senimdi. Baspasóz máslıhatyna Mádenıet jáne sport mınıstrligi Mádenıet jáne óner isteri departamentiniń dırektory A. Raıymqulova, «Astana Opera» memlekettik opera jáne balet teatrynyń dırektory T. Álpıev, rejısser Iý.Aleksandrov, dırıjer A. Muhıtdınov, «Astana Opera» teatrynyń jetekshi solısi J.Ǵabdýllına men bolgarııalyq tenor K. Chanev qatysyp, jýrnalısterdiń suraqtaryna jaýap berdi. Alǵash ret ashyq aspan astynda saltanat quratyn qoıylym álem sahnalaryndaǵy úlgini qaıtalamaı, erekshe janrda oryndalýymen, tehnıkalyq kúrdeli formatymen, sondaı-aq kórermender talǵamy barynsha eskerilip, kópshilikke kóterińki kóńil-kúı syılaý úshin jan-jaqty jaǵdaılar týǵyzýymen opera óneri tarıhyndaǵy eleýli oqıǵa ǵana emes, jalpy elorda ımıdji úshin de keremet áser túıdiretin tyń ıdeıa bolyp qalmaq. – Astana kúniniń qurmetine túrli mádenı syı-tartýlar ázirlenýde, – dedi Aqtoty Raıymqulova. – Álem sahnalarynda ótken ǵasyrlardan úzilmeı júrip kele jatqan Dj. Verdıdiń «Aıda» operasy mundaı aıtýly kúnge qaı jaǵynan bolsyn laıyqty ekeninde sóz joq. Ondaǵy keıipkerler múddesi, sahnalyq saltanat, azattyq jolyndaǵy janaıǵaı men súıispenshilik úshin kúres ıdeıasynyń ózi osy kúnniń rýhymen úndesip turǵany taǵy shyndyq. Teńdessiz opera týyndysynyń qaıta túlep, ózgeshe naqyshta qulpyrýy álemdik deńgeıdegi qubylys bolyp tabylady. Sonymen qatar, teatr alańynyń aýqym­dylyǵy, orasan zor kórermen aýdıtorııasy, sahnalyq túpnusqaǵa qaraǵanda qatysýshy ártister sanynyń aıtarlyqtaı kóp bolýy, zamanaýı jaryq jáne beınequraldar qyzmeti spektakldiń merekelik sıpatyn aıshyqtaı túsetini aıtyldy. «Astana Opera» teatrynyń dırektory Tóleýbek Álpıev «Aıda» qoıylymyn «La Skalaǵa» arnaıy baryp kórgendegi áserlerimen bólisse, rejısser Iýrıı Aleksandrov dala sahnasyndaǵy erekshe janrdyń bolashaǵyna ekpin bere sóz sóıledi. «Kórermen Pıramıdaǵa jaqyndaǵan sátten-aq ǵajaıyp áserge bólenedi. Franko Dzeffırellıdiń nusqasynda janýarlar atymen joq. Al munda kádimgi oqıǵanyń ortasyna ózińiz túsip ketkendeı kúıge bólenerińiz haq. Oqıǵa kúnniń batar tusynda bólek sarynǵa aýysady. At erttegen shabandozdar kórinisi mysyrlyq sáýletti odan beter asha túsedi. Dzeffırellı dekorasııasy Reseı halyq sýretshisi Vıacheslav Okýnevtiń ulan-ǵaıyr beıneınstallıasııasyn tolyqtyryp, kórinis sońy Radamestiń saltanat quratyn sátimen aıaqtalady» dedi rejısser. Qoıylymda Radames partııasyn oryndaıtyn bolgar solısi Kamen Chanev óziniń elordaǵa osymen ekinshi ret atbasyn tirep otyrǵanyn aıta kelip: «Men bul qalanyń sonshalyq shapshańdyqpen ósip kele jatqanyna qyzyǵamyn. Osy rólge munda asyǵýymnyń sebebi de sodan. Sizder úshin aıanbaı óner kórsetýge daıynmyn», dep aǵynan jaryldy. Teatrdyń solısi Jupar Ǵabdýllına Otandy, mahabbatty jyrlaıtyn sahnalyq týyndyny kásibı turǵyda áńgimelese, dırıjer Abzal Muhıtdınov joba avtorlaryna óziniń rızashylyǵyn jetkizdi. Spektakldegi Radames partııasyn oryndaý úshin Bolgarııa tenory Kamen Chanev arnaıy shaqyrylsa, basty róldi «Astana Opera» teatrynyń jetekshi solısi Jupar Ǵabdýllına somdaıdy, al Qazaqstannyń eńbek sińirgen qaıratkerleri Dına Hamzına – Amnerıs partııasyn, Talǵat Musabaev –Amonasrony, Armenııanyń halyq ártisi Barseg Týmanıan abyz Ramfısti beıneleıdi. Spektaklge shamamen 300 adam – solıster, hor, balet, mımans ártisteri, Qorǵanys mınıstrliginen sarbazdar qatysady. Eske sala keteıik, jobany júzege asyrýshy Iýrıı Aleksandrov Qazaqstanmen erekshe baılanystaǵy adam. Onyń eńbeginiń Kúlásh Baıseıitova atyndaǵy teatrdyń, «Astana Opera» teatrynyń ashylýyna tikeleı qatysy bar. Qoıýshy-rejısser Qazaqstanda birqatar tamasha operalyq spektakldi jaryqqa shyǵarǵan. Bizdegi onyń sońǵy jumystarynyń biri retinde, elordalyq teatrdyń basty týyndysyna aınalǵan Muqan Tólebaevtyń «Birjan-Sara» operasyn atap ótýge bolady. Qarashash TOQSANBAI, «Egemen Qazaqstan».