Otandyq bıznestiń órisi keń

Keshe Astanada «Nur Otan» partııasy janyndaǵy Kásipkerlikti qoldaý jónindegi respýblıkalyq qoǵamdyq keńestiń alǵashqy otyrysy ótti. Oǵan «Nur Otan» partııasy Tóraǵasynyń birinshi orynbasary Baýyrjan Baıbek, Parlament depýtattary jáne bıznes ókilderi qatysty. Jıyndy ashqan Baýyrjan Baıbek óziniń kirispe sózinde «Nur Otan» partııasy janyndaǵy «Shaǵyn jáne orta kásipkerlikti qoldaý» boıynsha sarapshylar toby endi Kásipkerlikti qoldaý jónindegi respýblıkalyq qoǵamdyq keńeske aınalǵanyna toqtaldy. Onyń aıtýynsha, otandyq bıznestiń básekege qabilettiligin arttyrý baǵytyndaǵy tujyrymdamalyq usynystardy ázirleý jáne «Nur Otan» partııasynyń, Ulttyq kásipkerler palatasynyń, bıznestiń, qoǵamdyq birlestikter men memlekettik organdardyń kúsh-jigerin biriktirý atalǵan keńestiń basty mindeti bolmaq.Budan bólek, ol bıznestiń el da­mýyndaǵy erekshe róline kóńil aýdardy. – Bıznes ekonomıkalyq damýdyń qozǵaýshy kúshi, ınnovasııanyń negizgi bastaýshysy bolyp tabylady. Bıznes orta taptyń negizi men azamattyq qoǵamnyń tiregi bola otyryp, jumyspen qamtý boıynsha mańyzdy áleýmettik mıssııany atqarady. Sondyqtan, «Nur Otan» otandyq bıznesti jan-jaqty qoldaıdy. Bizdiń maqsatymyz – otandyq bıznes pen kásipkerlik rýhty kúsheıtýge yqpal etý, ulttyq bıznes úshin qolaıly jaǵdaı jasaý, sol arqyly ekonomıkany damytý, – dedi Baýyrjan Baıbek. Onyń sózine qaraǵanda, elimizdiń EAEO men DSU ıntegrasııalyq birles­tik­terine kirý qarsańynda otandyq bıznes úshin jaǵdaılar túbegeıli ózgergen. Birigýdiń arqasynda qazaqstandyq kásipkerlerge EAEO-nyń, odan bólek, DSU-ǵa múshe 160 eldiń naryǵy ashyldy. Alaıda, ishki naryqtyń ashylýymen básekelestik kúsheıýde, bul otandyq bıznes úshin kúrdeli synaq bolyp otyr. Sondaı-aq, B.Baıbek partııanyń jekemenshikke qol suqpaýdy, ashyq básekelestikti, qolaıly ınvestısııalyq ahýal qurýdy, óńirlerdiń úılestirilgen damýyn, ınnovasııa men eksportty yntalandyrýdy, ekonomıkany ártaraptandyrýdy, ınfraqurylymdy damytýdy jaqtaıtynyn jetkizdi. Buǵan qosa, otyrys barysynda B.Baıbek qazirgi tańda Memleket basshysy saıasatynyń arqasynda elimizde kásipkerlik úshin júıeli jaǵdaılar jasalǵanyna nazar aýdardy. – «Nur Otan» partııasynyń se­zinde Elbasy bastamashy bolǵan bes halyqtyq reforma bıznestiń damýy men Qazaqstannyń álemdegi eń damyǵan 30 eldiń qataryna qosylýy úshin ınstı­týttyq jaǵdaı týǵyzýǵa baǵyttalǵan, – dedi B.Baıbek. Sonymen birge, B.Baıbek memlekettik apparattyń, bıznes pen qoǵamnyń senimdi ári ózara tyǵyz áreketi kez kelgen syn-tegeýringe tótep berýge múmkindik bere­tinin atap ótti. Jıynda sóz sóılegen Májilis depýtattary Aıgúl Soloveva, Shalataı Myrzahmetov jáne basqalar Memleket basshysynyń sarabdal saıasaty shaǵyn jáne orta kásipkerliktiń damýyna qolaı­ly jaǵdaı jasap berip otyrǵanyn, bes ınstıtýttyq reformany júzege asyrý el damýynyń basty kepili bola alatynyn jetkizdi. Aıta keteıik, partııa janyndaǵy Kásipkerlikti qoldaý jónindegi respýb­lıkalyq qoǵamdyq keńeske Májilis depýtaty Aıgúl Soloveva basshylyq etetin boldy. Ol buǵan deıin «Shaǵyn jáne orta kásipkerlikti qoldaý» boıynsha sarapshylar tobyna jetekshilik etip kelgen-di. Al atalǵan keńestiń quramyna Parlament depýtattary, Ulttyq kásipkerler palatasynyń, bıznes-qoǵamdastyqtyń, memlekettik organdardyń ókilderi jáne belgili sarapshylar kirdi. Joldybaı BAZAR, «Egemen Qazaqstan».