Qaraǵandylyq stýdent baılanys operatoryna 310 myń teńge qaryz boldy

ASTANA. 31 naýryz. Jańa jyl qarsańynda qaraǵandylyq stýdent lımıtsiz ınternet jelisin tutynamyn dep uıaly baılanys operatorlaryna 310 myń teńge qaryz bolyp qaldy. Bul týraly nv.kz habarlady. Tarqata aıtsaq, stýdent aǵasynan syılyqqa «sım-karta» alyp, ınternetti týra bir aı paıdalanǵan. Basynda jeli operatorlary «nómirge eki myń birlik júkteseń boldy, qajetińshe tutynasyń», dep sendirgen. Alaıda, stýdenttiń úıine «Sizdiń uıaly baılanys kompanııasyna qaryzyńyz 260 myń» degen habarlama keledi. Mán-jaıdy anyqtaý maqsatynda operatorǵa jolyqqan jigit eki kúnniń ishinde qaryzy 310 myń teńgege deıin óskenin biledi. Stýdenttiń anasy Baqyt Jakenova qaladaǵy tutynýshylar quqyǵyn qorǵaý ortalyǵyna shaǵym túsirdi. Mán-jaıdy anyqtaý maqsatynda ortalyq basshysy Jasulan Aıtmaǵanbetov uıaly baılanys operatorlarymen habarlasatynyn aıtty. Sondaı-aq, stýdenttiń ákesi Erbol Jakenov qorǵaýshylardyń kómegine júginip otyr. Ázirge qorǵaýshylar uıaly baılanys opreatorlarynyń aldaǵy áreketin kút degen keńes berdi. «Eger olar jigitti sotqa berse, onda oqıǵanyń sebep-saldary anyqtalatyn bolady. Jan-jaqty tekseristen keıin uıaly baılanys kompanııasy óz qatelikterin túsinedi», – deıdi qorǵaýshylar. Erbol Jakenov: «Meniń olarǵa beretin aqsham joq. Meıli sotqa bersin, múlkimdi tárkilesin báribir 310 myń teńge tóleı almaımyn. Ulym stýdent. Onyń jolaqysyn zorǵa taýyp berip otyrmyn», – deıdi. Talǵat Raıymbek. Derek; nv.kz. Sýret: all.biz.