Qııal qanatynda

Talantsyz bala bolmaıdy, tek onyń tynysyn ashyp, der kezinde bir arnaǵa baǵyttaı bilý kerek. Atalarymyzdyń: «Jasta bergen tárbıe, jas shybyqty ıgendeı» deıtini de sondyqtan. Mine, balalardy osyndaı ıgi izdenisterge ıkemdep, qııalyna qanat bitirip otyrǵan Mártók aýylyndaǵy «Balalardyń tehnı­kalyq shyǵarmashylyq ortalyǵy» MM-iniń qol jetken tabystaryn estigende kóńilimiz marqaıyp qaldy. Sebebi, bul aýdan ortalyqtarynda jumys isteıtin jalǵyz ortalyq. Biz ortalyqqa kelgende oqý jyly aıaqtalyp, óz kúshterimen jóndeý jumystaryna kirisip te ketken eken. Ortalyq dırektory Ildar Shakırov óz áńgimesin ortalyqtyń qalaı qurylǵandyǵynan bastady. Onyń aıtýynsha, bul buryn mılısııa, sot ǵımaraty bolǵan eken, keıin munda oqý – óndiristik kombınaty ornalasqan. Kombınat taraǵannan soń 2009 jyly qurylǵan osy ortalyqqa berilipti. Sol kezde dırektorlyq tizginin ustaǵan Ildar Shakırov ustazdardy da ózi taýyp, shaqyryp, jumysty kúıi ketken ǵımaratty «alham shúkirge» keltirýden bastapty. – Bastapqy jyldary nebári bes úıirme jumys istedi. Men ózim osy aýylda ustazdyq etke­nime otyz jyldan asty. Kezinde oqý-óndiristik kombınatyn da bas­qardym. Qaı ustazdyń nege ıkemi bar ekenin bilemin, sondyqtan shamam kelgeninshe, isti ilgeri aparýǵa birge jumylatyn, qolynan is keletin ustazdardy jumysqa tarttym. Biz kóp ýaqyt ótpeı jumysty qalypqa túsirdik, balalardy kóptep tartýǵa qol jetkizdik, – deıdi ol. Ortalyqtyń Hleboda­rovka­daǵy fılıalynda úsh topta balalar avıamodelmen al, Vozne­senovkadaǵy topta qyzdar is tigý jáne modeldeýmen shuǵyldanady. Eldi mekenderde fılıaldar júıesin keńeıtý jalǵasa beredi. Qazir balalardyń tehnıkalyq shyǵarmashylyq ortalyǵynda on eki ustaz eńbek etedi. Olardyń bári óz isine berilgender, balalardy jaqsyǵa talaptandyryp, qolǵa alǵan shyǵarmashylyǵyna qushtarlyǵyn oıatýǵa sheberlikteri jetkilikti mamandar. Balalardyń qııalyn keńeıtedi, bos ýaqyttaryn tıimdi ótkizýge uıtqy bolady. Al aǵashtan túıin túıetin Edilbaı Orazymbetovtyń shákirt­teri osy óńirde ósetin aǵashtardy óńdep, buıymdar jasaıdy eken. Olardyń qolynan shyqqan ár­túrli qolóner buıymdary jáne basqa zattar oblystyq kórmelerge qoıylyp, birinshi orynǵa ıe bolyp júrgen kórinedi. Aǵashtan órnektep jasalǵan sandyqqa turǵyndardan da suranys bar eken. Balalar jergilikti qaraǵashty óńdep, qııaldaryndaǵy zattardy jasaýǵa tóselip alypty. Sonyń biri «Fantazııa» kýbogy bizge unady. Shákirtteriniń aldy osy qolóner mamandyǵyn tańdap, joǵary oqý ornyna túsken. Satybaldy SÁÝIRBAI, «Egemen Qazaqstan». Aqtóbe oblysy, Mártók aýdany.