QOSTANAI. 18 mamyr. Qostanaı oblysynyń aýmaǵynda Qostanaı oblysynyń Tótenshe jaǵdaılar departamenti jáne Reseı Federasııasy Chelıabi jáne Qorǵan oblystarynyń Tótenshe jaǵdaılar Bas basqarmasy birlesip, iri orman jáne dala órtteri saldarynan bolatyn transshekaralyq tótenshe jaǵdaılardyń aldyn alý jáne olardy joıý jónindegi ózara is-qımyl jasaýdy uıymdastyrý boıynsha birlesken komandalyq-shtabtyq oqý-jattyǵýlaryn ótkizdi. Bul týraly egemen.kz habarlady.
Qostanaı oblystyq Tótenshe jaǵdaılar departamentiniń bastyǵy, órtke qarsy qyzmet polkovnıgi Talǵat Kákimov ótkizilip otyrǵan oqý-jattyǵýda aldaǵy ýaqytta bolýy yqtımal tótenshe jaǵdaılarda shekaralyq memleketterdiń TJ shuǵyl-kezekshi qyzmetindegi jeke quramnyń ózara is-qımyl biriktirýi tekserilgenin atap ketti. Shekarany ruqsat etilgen orynda ótýiniń jáne ruqsat etilmegen orynda ótýiniń yqshamdalǵan tártibi boıynsha ózara qımyldar pysyqtaldy. Sonymen qatar oqý-jattyǵý barysynda transshekaralyq tótenshe jaǵdaılar týraly aqparattardy jedel berý jáne birikken áreketterdiń qaıtyp óńdelýi boıynsha shuǵyl-kezekshilik qyzmetindegi jeke quramnyń tájirıbelik daǵdylary jetildirildi.
Komandalyq-shtabdyq jattyǵýlar Qostanaı oblysy Fedorov aýdanynyń Keńaral eldi mekenine jaqyn mańdaǵy Chelıabi oblysynyń shekarasynda ótkizildi. Qazaqstan jáne Reseı shekaralyq órt bólimsheleriniń qutqarýshylarymen transshekaralyq aýmaqtaǵy orman jáne dala órtin joıý boıynsha birikken is-qımyldary pysyqtady.
Jattyǵýǵa Qazaqstan tarapynan 16 tehnıka jáne jeke quramdaǵy 46 adam, erikti órtke qarsy qurylym, Reseı tarapynan 3 birlik tehnıka, 16 adam qatysty.
Jattyǵý qorytyndysynda eki eldiń qutqarýshy bólimsheleriniń joǵarǵy uıymdastyrýshylyǵy jáne rettelgeni ataldy.
Názıra Járimbetova.
Derek, sýret: egemen.kz
