Jarty álemdi sharlaǵan

serb saıahatshysy Pavlodarǵa jetti Velosıpedpen jarty álemdi sharlap ótýge bel býǵan serb saıahatshysy Pavlodarǵa jetti. Ol bul saparyn 12 sáýirde Serbııa astanasy – Belgrad qalasynan bastaǵan bolatyn. Sodan beri 5 myń shaqyrym joldy artta qaldyrǵan Dragan Shıbalıch Rýmynııa, Ýkraına, Belarýs jáne Reseı elderin basyp ótken. Osylaısha velosaıahatshy Japonııa astanasy – Tokıoǵa deıin jetýdi kózdeıdi. Al ol úshin Shıbalıch taǵy 15 myń shaqyrym joldy artta qaldyrýy tıis. Serbııa azamaty bul saparyn alty aıda aıaqtap, álem rekordyn jańǵyrtýdy maqsat tutyp otyr. Pavlodardan bólek ol elimizdiń Aqtóbe, Qostanaı jáne Astana qalalaryna atbasyn tiredi. Ári qaraı, saıahatshy Reseıdiń Novo­sibir qalasy jáne Mońǵolııa, Oń­­tústik Koreıa elderi arqyly ditte­gen jerine jetýdi josparlap otyr. Alys baǵytty betke alǵan 37 jastaǵy serbııalyq ózimen birge túnde túneıtin shatyr, noýtbýk jáne sý quıatyn quty ǵana alyp shyqqan. Ol kúnine 150 shaqyrymǵa deıin jol júredi. Dragan Shıbalıchtiń negizgi mamandyǵy – elektrık. Degenmen, bala kúninen saıahatqa jany qumar ol búginge deıin velosıpedpen biraz jerdi sharlaǵan. О́tken jyly týǵan qalasy Kralevten bastaý alǵan sapar Máskeý – Krasnodar – Ystambul baǵyty boıynsha órbidi. Bul saıahatyn ol ózi jankúıeri bolyp tabylatyn «Partızan» bas­ketbol ko­man­dasynyń qurme­tine arnaǵan. Sondaı-aq, 700 shaqy­rymǵa so­zylǵan Mılanǵa deıingi sapary da Shıbalıchtiń maqtan tutarlyq jetistikteriniń biri. Bul – saıahatshynyń Qa­zaq­stan­ǵa alǵash ret kelýi. Buǵan ­deıin biz­diń el týraly kóp estigeni­men dál mun­daı qurmetti kútpege­nin jasyrmady. – Men Eýropanyń Italııa, Ger­­manııa, Makedonııa sekildi bir­qatar elinde boldym. Alaıda, Qa­zaq­­standaǵydaı qonaq­jaı­ly­lyq pen iltı­patty esh jerden kez­des­tirme­dim. Sizdiń elde ár adam kómek qolyn sozýǵa daıyn­ eken. Bar­lyǵy birdeı úıine qo­naq­qa sha­qyryp, dám usynady. Tanymaıtyn jandy qonaqqa shaqyrý men úshin tań­ǵalarlyq jaıt, – deıdi saıahatshy. Pavlodarda serb saıahatshysy oblystyq ólketaný mýzeıinde bolyp, óńirdiń tarıhymen tanysty. Shıbalıchtiń bir kúndik shyǵyny 15 dollardan aspaıdy. Bul qarjy negizinen tamaqqa jumsalady. Al túnde ózimen birge alyp shyqqan shatyrda túneıdi. Elaman QOŃYR, «Egemen Qazaqstan».